Алматыда ұлттық құндылықтарға арналған ғылыми-практикалық конференция өтті.
31 қазанында Алматы қаласындағы Республикалық ғылыми-педагогикалық кітапханада «Ұлттық құндылықтар академиясы» республикалық қоғамдық бірлестігінің ұйымдастыруымен «Ұлттық құндылықтар: таным, тағылым. Адал азамат» атты ғылыми-практикалық конференция өтті.
Шараға Мәжіліс депутаты Мұрат Әбенов, қоғам қайраткері Асылы Осман, Қазақстанның Еңбек Ері, білікті педагог Аягүл Миразова, еліміздің әлеуметтік-экономикалық дамуына елеулі үлес қосып жүрген қоғам қайраткерлері, ҚР Оқу-ағарту министрлігінің, «Аманат» партиясының, Алматы қалалық және аудандық мәслихаттарының өкілдері, ғалымдар, педагог-практиктер, жазушылар мен оқулық авторлары, сондай-ақ қоғамдық ұйымдар мен баспа және БАҚ өкілдері қатысты.
Конференцияда ұлттық құндылықтардың білім мен тәрбиенің біртұтастығын қамтамасыз етудегі рөлі, сонымен қатар оларды ғылыми-әдіснамалық және практикалық тұрғыда іске асыру жолдары талқыланды. Қатысушылар құндылыққа бағдарланған тәрбие жұмыстарының үздік тәжірибелерімен бөлісіп, өз ұсыныстарын ортаға салды.
Шара аясында көркем әдебиеттер мен оқулықтар көрмесі ұйымдастырылды. Көрмеге «Атамұра», «Алматыкітап», «Арман-ПВ», «Көкжиек», «Мектеп» сынды ірі баспалар өз өнімдерін ұсынды. Сондай-ақ зерттеу нәтижелері негізінде дайындалған ғылыми ұжымдық еңбектердің тұсаукесері өтті.
Конференция мазмұнды да тағылымды өтті. Қонақтар мен қатысушылар оқушылар мен педагогтердің өнерін тамашалап, рухани құндылықтардың қоғам өміріндегі маңызын тағы бір мәрте айқындады.