Президент Қасым-Жомарт Тоқаевтың әлеуметтік маңызы бар азық-түлік бағасын тұрақтандыру және отандық өндірушілерді қолдау жөніндегі тапсырмасын орындау аясында Алматы қаласының әкімі Дархан Сатыбалды азық-түлік өнеркәсібі кәсіпорындарын аралады.
Сапар барысында қала басшысы «Ақсай» нан-тоқаш комбинаты, «Алматы нан» нан комбинаты және «Масло-Дел» компаниясында болды.
«Ақсай» нан-тоқаш комбинатында әкім өндірістік желілер мен жеткізу логистикасымен танысты. Кәсіпорын жыл сайын шамамен 48,7 мың тонна өнім шығарып, қала халқының әлеуметтік нанға деген сұранысының 50%-ына дейін қамтамасыз етеді. Мұнда 1 200-ден астам қызметкер жұмыс істейді.
«Алматы нан» комбинаты тәулігіне 100 тоннаға дейін нан-тоқаш өнімдерін шығарады, оның 30 тоннасы әлеуметтік нанға тиесілі. Компанияда 166 адам еңбек етеді, орташа жалақы – 300 мың теңге. Екі кәсіпорын бірігіп, алматылықтардың нан-тоқаш өнімдеріне, соның ішінде әлеуметтік нанға деген негізгі сұранысын қамтамасыз етіп отыр.
Сапар «Масло-Дел» компаниясына барумен аяқталды. Бұл Қазақстандағы май-тоң май және сүт өнімдерін шығаратын ірі кәсіпорындардың бірі. Кәсіпорын бес өндірістік алаң мен 24 сату филиалын біріктіреді, онда 3 000-нан астам адам жұмыс істейді. Өндірістің жылдық көлемі 150 мың тоннадан асады, бұл кейбір өнім санаттары бойынша елдің ішкі нарығының шамамен 33%-ы.
Қала әкімі Алматының отандық өндірушілерді жүйелі түрде қолдайтынын, өндірісті жаңғырту мен кеңейтуге жағдай жасайтынын атап өтті.
«Әкімдік тарапынан өндірушілерге қажетті қолдау көрсетуге дайынбыз. Ең бастысы, әлеуметтік маңызы бар азық-түлік бағасының өсуіне жол бермеу, олардың тұрақты өндірісі мен ішкі нарыққа үздіксіз жеткізілуін қамтамасыз ету», — деді Алматы әкімі Дархан Сатыбалды.
Сапар қорытындысы бойынша қала басшысы тиісті басқармаларға көтерме және бөлшек бағаға тұрақты мониторинг жүргізуді, кәсіпорындарға инфрақұрылымдық және кадрлық мәселелерді шешуде жәрдемдесуді, сондай-ақ баға қалыптастырудың ашықтығын сақтап, азық-түлік жеткізілімдерінің тұрақтылығын қамтамасыз етуді жүктеді.
Алматы әкімдігі алдағы уақытта да отандық кәсіпорындарға жан-жақты қолдау көрсетіп, әлеуметтік маңызы бар азық-түлік бағасын бақылауды және мегаполистің азық-түлік қауіпсіздігін басты назарда ұстайды.