Satbayev University-дің жалпы физика кафедрасының оқытушысы, Жапонияда білім алған Дидар Шоқов атом электр станциясын салуды қолдайды, деп хабарлайды aqshamnews.kz
– 2011 жылдан кейін Жапония атом энергетикасы бойынша ең қатаң қауіпсіздік стандарттарын енгізді. Бұл стандарттар әлемдегі ең қауіпсіз болып саналады. Осыған байланысты Қазақстан олардың тәжірибесін толықтай пайдалана алады, – деді ғалым.
Қауіпсіздікті қамтамасыз ету үшін маман сенімді жеткізушілер мен серіктестерді дұрыс таңдаудың маңыздылығын атап өтті. Оның пікірінше, АЭС құрылысына кем дегенде он жыл қажет болады.
– Менің ойымша, атом электр станциясы еліміздің энергетикалық қауіпсіздігін арттырады. АЭС – дұрыс пайдаланылған жағдайда өте сенімді және қауіпсіз нысан, әрі болашағы зор энергия көзі. Әрине, басқа да станциялар сияқты оның да өз кемшіліктері бар, бірақ артықшылықтары басымырақ, – деп атап өтті Дидар Шоқов.
Ғалым АЭС-ті ЖЭО-мен салыстыра отырып, алғашқысының экологиялық артықшылықтарына тоқталды.
– ЖЭО қоршаған ортаны қатты ластайды. АЭС-тің де өз ластау көздері бар, бірақ олар негізінен ядролық отын қалдықтарына қатысты. Бүгінгі ғылым бұл қалдықтарды оқшаулап, сақтауды жақсы меңгерген. Ал ЖЭО-дан шығатын шаң мен газдармен әлі күресудің тиімді әдісі табылған жоқ. Ядролық қалдықтардың экологияға ғаламдық әсері жоқ, – деп санайды ол.
Дидар Шоқовтың пікірінше, АЭС құрылысы Қазақстанға кем дегенде 10-15 миллиард доллар инвестиция тартады. Егер шетелдік компаниялар құрылысқа қатысса, бұл көптеген жаңа жұмыс орындарын ашады.
– Құрылыс пен пайдалану үшін бірнеше мың білікті маман қажет болады. Бұл Қазақстан ғылымына да оң әсер етеді. Ұзақ мерзімді перспективада бұл жоба еліміздің әртүрлі салаларына көптеген оң әсерін тигізеді, – деп қорытындылады ғалым.