پرەزيدەنت شەتەلدەن قايتارىلعان اكتيۆتەر قايدا جۇمسالاتىنىن ايتتى
ۇكىمەت شەتەلگە زاڭسىز شىعارىلعان كاپيتالدى قايتارۋ ءۇشىن قاجەتتى زاڭ جوباسىن ازىرلەيدى. بۇل تۋرالى مەملەكەت باسشىسى قاسىم-جومارت توقايەۆ پرەزيدەنتتى ۇلىقتاۋ راسىمىندە ايتتى، دەپ حابارلايدى قازاقپارات ءتىلشىسى.
«ءبىز ادىلدىكتى قالپىنا كەلتىرىپ، ەلدەن زاڭسىز شىعارىلعان بارلىق اكتيۆتى قايتارۋعا ءتيىسپىز. بۇل ءۇشىن ۇكىمەت زاڭسىز شىعارىلعان كاپيتالدى قايتارۋ ءۇشىن قاجەتتى راسىمدەردى رەتتەيتىن زاڭ جوباسىن ازىرلەيدى. سونىمەن قاتار زاڭ جوباسى ادىلەتسىز بايۋعا جانە اكتيۆتەردى زاڭسىز شىعارۋعا ىقپال ەتەتىن سەبەپتەر مەن شارتتاردى جويۋعا باعىتتالادى»، - دەدى قاسىم-جومارت توقايەۆ.
سونىمەن بىرگە، پرەزيدەنت قايتارىلعان بارلىق قاراجات ازاماتتاردىڭ يگىلىگىنە جۇمسالۋى قاجەتتىگىن باسا ايتتى.
«بۇل قارجىنى جوعارى تەحنولوگيالى ءوندىرىس ورىندارىن اشۋعا، مەكتەپتەر مەن اۋرۋحانالار سالۋعا، الەۋمەتتىك جوبالاردى جۇزەگە اسىرۋعا پايدالانۋ كەرەك. ءتيىستى جارلىققا بۇگىن قول قويامىن. جاقىن ارادا اۋقاتتى كاسىپكەرلەر حالىقتىڭ يگىلىگى ءۇشىن وزدەرىنىڭ الەۋمەتتىك جاۋاپكەرشىلىگىن جانداندىرادى دەپ ويلايمىن»، - دەدى ق. توقايەۆ.