ونىڭ سەبەبىن دە ءتۇسىندىردى.
قازاقستاننىڭ ۇلتتىق بانك ءتوراعاسى عالىمجان ءپىرماتوۆ قازىرگى جاعدايدا ينفلياسيانىڭ ءوسۋ ءۇردىسىن كەرى قايتارۋ ءۇشىن بازالىق مولشەرلەمەنى ارتتىرۋ قاجەتتىلىگىن ايتتى، دەپ حابارلايدى Almaty-akshamy.kz.
ەستەرىڭىزگە سالا كەتسەك، قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى جونىندەگى كوميتەتى وسى جىلدىڭ 25 ساۋىرىندە بازالىق مولشەرلەمەنى + / - 1،00 پ. ت. پايىزدىق دالىزىمەن جىلدىق 14% دەڭگەيىندە بەلگىلەۋ تۋرالى شەشىم قابىلداعان بولاتىن.
ماماننىڭ ايتۋىنشا، بۇل رەتتە بازالىق مولشەرلەمەنىڭ دەڭگەيىنە قاتىستى شەشىم تەڭدەستىرىلگەن جانە بۇل شەشىم ونىڭ ەكونوميكالىق بەلسەندىلىككە اسەرىن ەسكەرە وتىرىپ قابىلدانادى.
«ءبىز بۇدان نەسيەلەۋگە جانە ەكونوميكالىق وسۋگە ايتارلىقتاي ءقاۋىپ توندىرمەيتىنىن كورىپ وتىرمىز، ءبىراق ينفلياسيانى باقىلاۋ ءۇشىن اسا ماڭىزدى. بەلگىلەنگەن بازالىق مولشەرلەمەنىڭ دەڭگەيىنە قاتىستى ايتاتىن بولساق، قازىرگى ۋاقىتتا وڭتايلى شەشىم بولعانى ءسوزسىز جانە بۇگىنگى قالىپتاسقان جاعدايعا تولىقتاي سايكەس كەلەدى. جۇمسارتىلعان اقشا-كرەديت ساياساتى ءبىر مەزەتتىك كۇماندى پايداعا كەنەلتۋى مۇمكىن، ءبىراق ۇزاق مەرزىمدى پەرسپەكتيۆادا ونىڭ سالدارى قايتارىمسىز بولادى»، – دەدى عالىمجان ءپىرماتوۆ قۇب-تىڭ باسپاسوز-بريفينگى كەزىندە.
بريفينگتە ايتىلعان مالىمەتتەرگە سايكەس، نەسيەلەندىرۋ كولەمىنىڭ وسۋىنە قاراپ ەكونوميكالىق بەلسەندىلىكتى باعالاۋعا بولادى. ماسەلەن، ءبىرىنشى توقساندا ەكونوميكاعا بەرىلگەن جاڭا كرەديتتەردىڭ كولەمى وتكەن جىلدىڭ وسى كەزەڭىمەن سالىستىرعاندا 25،3%-عا ۇلعايدى، ونىڭ ىشىندە بيزنەسكە – 19،6%، حالىققا – 32،5%.
«دەگەنمەن، 2022 جىلدىڭ ناۋرىز ايىنىڭ قورىتىندىسى كورسەتكەندەي، بەلگىسىزدىك بەلەڭ الىپ، نەسيە بەرۋ شارتتارى وزگەرىپ جاتقان جاعدايدا مولشەرلەمەنىڭ كوتەرىلگەنى كرەديتتەۋ ءۇشىن تەجەۋشى فاكتور بولمايدى»، - دەدى عالىمجان ءپىرماتوۆ.
بازالىق مولشەرلەمە بويىنشا قابىلدانعان بۇل شەشىم تەڭگەدەگى اكتيۆتەردىڭ تارتىمدىلىعىن ارتتىرادى. بۇل ءوز كەزەگىندە حالىقتىڭ رايىن تۇتىنۋشىدان جيناقتاۋعا قايتا تەڭدەستىرۋگە مۇمكىندىك بەرەدى.
«سونىمەن قاتار ينفلياسيالىق كۇتۋلەردىڭ تراەكتورياسىن، ينفلياسيا بويىنشا جاڭارتىلعان بولجامداردى، جيىنتىق سۇرانىس پەن يمپورتتى، سونداي-اق باسقا دا قوسىمشا ينفلياسيالىق شوكتاردىڭ پايدا بولۋ تاۋەكەلىن ەسكەرە وتىرىپ، اقشا-كرەديت شارتتارىن ودان ءارى كۇشەيتۋ ءۇشىن دە ساقتالعان كەڭىستىك بار»، - دەپ تۇيىندەدى عالىمجان ءپىرماتوۆ.
قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى جونىندەگى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2022 جىلى 6 ماۋسىمدا نۇر-سۇلتان ۋاقىتى بويىنشا ساعات 15:00-دە جاريالانادى.