تۇركيانىڭ كەيبىر اۋداندارىندا ىزدەستىرۋ جۇمىستارى توقتادى

قۇتقارۋشىلاردىڭ وزدەرىنە ءقاۋىپ ءتوندى.

سەنبى كۇنگى كەشكى مالىمەت بويىنشا، تۇركيادا جەر سىلكىنىسىنەن قازا تاپقاندار سانى 24 مىڭنان استى. ءتىرى قالعانداردى ىزدەستىرۋ جۇمىستارى جالعاسىپ جاتىر، ءبىراق نەمىس جانە اۆستريالىق قۇتقارۋشىلار توناۋ مەن اتىس سالدارىنان اپات اۋماعىندا جۇمىسىن توقتاتتى. بۇل تۋرالى اlmaty-اkshamy.kz قازاقپاراتقا سىلتەمە جاساپ حابارلايدى.

قۇتقارۋشىلاردىڭ وزدەرىنە ءقاۋىپ ءتوندى. ەكى نەمىس ۇيىمى – گەرمانيانىڭ حالىقارالىق ىزدەستىرۋ جانە قۇتقارۋ قىزمەتى (ISAR) جانە گەرمانيانىڭ تەحنيكالىق كومەك كورسەتۋ جونىندەگى فەدەرالدىق اگەنتتىگى (THW)، ودان كەيىن تاعى بىرنەشە ۇيىم تۇركيانىڭ وڭتۇستىگىندە قۇتقارۋ جۇمىستارىن توقتاتتى.

«ءارتۇرلى توپتار اراسىنداعى قاقتىعىس تۋرالى حابارلار كوبەيىپ كەلەدى، سونىمەن قاتار وق اتقان دىبىستار دا ەستىلەدى»، - دەپ ءتۇسىندىردى ISAR وكىلى شتەفان حاينە.

ISAR جانە THW تۇركيانىڭ ازاماتتىق قورعانىس قىزمەتى تۇركيا توتەنشە جاعدايلار باسقارماسى (AFAD) ءقاۋىپ سەيىلگەنىن حابارلاعان جاعدايدا، ىزدەستىرۋ جۇمىسىنا قايتا كىرىسۋگە دايىن ەكەنىن جەتكىزدى.

بۇعان دەيىن اۆستريا اسكەريلەرى تۇركياداعى قۇتقارۋ جۇمىسىن توقتاتقان بولاتىن. ولاردىڭ وكىلىنىڭ ايتۋىنشا، كەيبىر توپتار اراسىنداعى اتىس-شابىس پەن مارودەرلىك قۇتقارۋشىلارعا ۇلكەن ءقاۋىپ تۋدىرىپ وتىر.

تۇرىك بيلىگى قاقتىعىستار نەمەسە اتىس تۋرالى حابارلاپ جاتقان جوق، ءبىراق ەل پرەزيدەنتى رەجەپ تاييپ ەردوعان سەنبى كۇنى جەر سىلكىنىسىنەن زارداپ شەككەن ايماقتا توناۋ فاكتىلەرى بار ەكەنىن مويىنداپ، بيلىك شارا قولداناتىنىنا سەندىردى.