الماتى وبلىسى تالعار اۋدانىنىڭ تۇرعىندارى تالعار وزەنىندەگى بالىقتىڭ جاپپاي قىرىلۋى مەن سۋدىڭ جاعىمسىز يىسىنە شاعىمداندى. ماماندار ماسەلەنىڭ ءمان-جايىن انىقتاپ جاتىر، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
كۋاگەرلەر وزەن جاعاسىنداعى ءولى بالىقتاردى ۆيدەوعا تۇسىرگەن. ولاردىڭ بولجاۋىنشا، جاقىن ماڭدا ورنالاسقان كومپانيا لاس سۋدى وزەنگە اعىزۋى مۇمكىن.
«الماتى وبلىسى، ەڭبەكشىقازاق اۋدانى، بازاركەلدى اۋىلى... بارلىق بالىق ءبىر ۋاقىتتا قىرىلىپ قالدى، سۋدان جاعىمسىز ءيىس شىعادى. مۇنىڭ ءبارى قاشان بىتەدى، ءبىرىنشى جىل ەمەس قوي. قاشان ناقتى شارالار قابىلدايدى؟» - دەپ شاعىمداندى تۇرعىندار الەۋمەتتىك جەلىلەردە.
ەڭبەكشىقازاق اۋدانىنىڭ اكىمدىگى حابارلاعانداي، قاپشاعاي بالىق ءبولىمىنىڭ ماماندارى ەكسپەديسيا ءبولىمىنىڭ باسشىسىمەن، تابيعاتتى قورعاۋ پوليسياسى قىزمەتكەرلەرىمەن جانە جاڭاشار اۋىلدىق وكرۋگىنىڭ اكىمىمەن بىرلەسىپ، 10 تامىز كۇنى بالىقتىڭ قىرىلۋى فاكتىسى بويىنشا تالعار وزەنىنىڭ جاعالاۋىن تەكسەرگەن.
«سۋدىڭ سىنامالارى الىنىپ، ءارى قاراي زەرتحانالىق تالداۋ ءۇشىن بالىق شاباقتارى جينالدى. تالداۋ ناتيجەلەرى الداعى ۋاقىتتا الماتى وبلىسىنىڭ ەكولوگيا دەپارتامەنتىنە جولداناتىن بولادى. ءتيىستى شارالار قابىلدانادى»، - دەپ جاۋاپ بەردى اكىمدىك.