سيفرلىق قۇجاتتاردى ۇيالى بايلانىس وپەراتورلارىنىڭ كەڭسەلەرىندە قولدانۋعا بولادى، دەپ حابارلايدى almaty-akshamy.kz قازاقپاراتقا سىلتەمە جاساپ.
ۆەدومستۆونىڭ مالىمدەۋىنشە، EGov mobile ءموبيلدى قوسىمشاسىنداعى «سيفرلىق قۇجاتتار» قىزمەتىنىڭ ارقاسىندا بايلانىس وپەراتورلارىنىڭ كليەنتتەرى قىزمەتتەردى الۋ ءۇشىن جەكە باسىن كۋالاندىراتىن قۇجاتتىڭ ءتۇپنۇسقاسىن ۇسىنباۋىنا بولادى.
«بۇگىنگى تاڭدا قۇجاتتىڭ ءتۇپنۇسقاسىن ۇسىنا المايتىندارعا ارنالعان قىزمەت Beeline ۇيالى بايلانىس وپەراتورىنىڭ قىزمەت كورسەتۋ ورتالىقتارىندا قولجەتىمدى. بۇل ءۇشىن كليەنتتىڭ سمارتفونىندا ەلەكتروندى ۇكىمەتتىڭ قوسىمشاسى eGov mobile بولۋى كەرەك»، - دەلىنگەن حابارلامادا.
مينيسترلىكتىڭ تۇسىندىرۋىنشە، سيفرلىق قۇجاتتاردى قولدانۋ ءۇشىن eGov ءموبيلدى قوسىمشاسىن جۇكتەپ الىپ، اشۋ قاجەت. سودان كەيىن، قىزمەتتەر قويىندىسىندا «سيفرلىق قۇجاتتار» ءبولىمىن تاڭداپ، اۆتوريزاسيادان ءوتۋ كەرەك. قوسىمشاعا بيومەتريا نەمەسە ءبىر رەتتىك SMS قۇپيا ءسوزى ارقىلى قوسىلۋعا بولادى.
اۆتوريزاسيادان كەيىن اشىلعان تەرەزەدە جەكە كۋالىكتى تاڭداپ، «رۇقساتتى اشۋ» باتىرماسىن باسۋ كەرەك. پروسەدۋرانى ورىنداۋ ءۇشىن، Beeline ۇيالى بايلانىس وپەراتورىنىڭ مەنەدجەرى QR كودىن سكانەرلەيدى جانە بيومەتريالىق دەرەكتەر ارقىلى كليەنتتىڭ جەكە باسىن كۋالاندىرادى.
«مەملەكەتتىك قىزمەتتەردى كورسەتۋدەگى ىڭعايلىلىق، قاۋىپسىزدىك جانە تيىمدىلىك بۇگىندە ءبىزدىڭ باسىمدىلىق بولىپ تابىلادى. بۇعان دەيىن كەيبىر قالالاردىڭ بانكتەرى مەن اۋەجايلارى سيفرلىق قۇجاتتاردى قابىلداي باستادى. بۇگىندە بۇل فۋنكسيا ءبىر ۇيالى بايلانىس وپەراتورىندا قولجەتىمدى، الايدا مينيسترلىك بارلىق قاۋىپسىزدىك پارامەترلەرىنە سايكەس كەلەتىن ءىرى كومپانيالار مەن ۇيالى بايلانىس وپەراتورلارى ءۇشىن اشىق»، - دەدى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين.
قازىرگى ۋاقىتتا سيفرلىق قۇجاتتار قىزمەتىندە 18 قۇجات تىركەلگەن، ولاردىڭ ىشىندە ەڭ تانىمالدارى: جەكە كۋالىك، جۇرگىزۋشى كۋالىگى، ەكپە ءتولقۇجاتى، پتر سىناعى جانە تۋۋ تۋرالى كۋالىك.
بۇعان دەيىن قازاقستاندىقتار سيفرلىق قۇجاتتاردى اۋەجاي، تەمىرجول ۆوكزالىنداعى ۆاگونداردا، بانك پەن نوتاريۋس قىزمەتتەرىنە جۇگىنگەن كەزىندە پايدالانۋعا مۇمكىندىك الدى.