قازاقستاندىق اسكەريلەر تۇنگى سپرينتتە توپ جاردى

ولار بارلىق تاپسىرمانى 10 مينۋت 33 سەكۋندتا ورىنداعان.

قازاقستاندىق اسكەريلەر حالىقارالىق ارميا ويىندارىندا «ارتيللەريادان وق اتۋ شەبەرلەرىنىڭ» تۇنگى سپرينت كەزەڭىندە توپ جاردى، دەپ حابارلايدى Almaty-akshamy.kz ق ر قورعانىس مينيسترلىگىنە سىلتەمە جاساپ.

قازاقستان كومانداسى بارلىق تاپسىرمانى 10 مينۋت 33 سەكۋندتا ورىنداپ، ۇزدىك ناتيجە كورسەتتى. ءازىربايجان اسكەري قىزمەتشىلەرى ەكىنشى ورىندا (14 مينۋت 15 سەكۋند)، رەسەيلىك ارتيللەريستەر ءۇشىنشى ورىننان (16 مينۋت 01 سەكۋند) كورىندى.

ايتا كەتەر جايت، ماسكەۋ ماڭىنداعى «الابينو» پوليگونىندا «تانك بياتلونى» بايقاۋىنىڭ ەكىنشى ەكيپاجدارىنىڭ جارىسىندا قازاقستاندىق تانكيستەر تاعى دا جەڭىسكە جەتتى.

تانك كومانديرى، اعا لەيتەنانت سەيىتجان قوبىلان ۇلى، كوزدەۋشى-وپەراتور سەرجانت باۋىرجان بۇعىبايەۆ جانە مەحانيك-جۇرگىزۋشى ەفرەيتور جاننۇر جۇمابايەۆتاردان تۇراتىن ەكيپاج كەدەرگىلەردى ەڭسەرىپ، اتىس تاپسىرمالارىن ءساتتى ورىنداپ شىقتى. قازاق جاۋىنگەرلەرى تراسسادان 26 مينۋت 35 سەكۋندتا وتە ءبىلدى.

ەكىنشى ورىنداعى وزبەكستان اسكەري قىزمەتشىلەرىنىڭ ناتيجەسى – 27 مينۋت 23 سەكۋند.

حالىقارالىق ارميا ويىندارى اياسىندا قازاقستاندا ءۇش بايقاۋ وتكىزىلەدى. ولار – «ارتيللەريادان وق اتۋ شەبەرلەرى»، «مەريديان» جانە «تاكتيكالىق مەرگەن». سوڭعى ەكەۋى قازاقستاندا العاش رەت ۇيىمداستىرىلىپ وتىر.

ەلىمىزدە وتەتىن سايىستاردا بارلىعى 26 كوماندا باعىن سىنايدى. ولاردىڭ ىشىندە ءازىربايجان، ارمەنيا، بەلارۋس، ۆەنەسۋەلا، ۆەتنام، زيمبابۆە، جۇڭگو، قىرعىزستان، مالي، رەسەي، تاجىكستان جانە وزبەكستاننىڭ اسكەريلەرى بار.

جامبىل وبلىسىنىڭ گۆاردەيسك گارنيزونىنداعى وقۋ-جاتتىعۋ پوليگونىندا مينااتقىش ەسەپتوپتارىنىڭ ۇزدىكتەردى انىقتالسا، اقمولا وبلىسىنىڭ ششۋچينسك قالاسىنداعى «اماندىق» پوليگونىندا اسكەري توپوگرافتاردىڭ سايىسى وتەدى. ال قاراعاندى وبلىسىنىڭ «سپاسسك» وقۋ-جاتتىعۋ ورتالىعىندا مەرگەندەر جارىسادى.