قازاقستاندا ەسىرتكى وندىرەتىندەر ەندى ءومىر بويى باس بوستاندىقتارىنان ايىرىلۋى مۇمكىن

بۇگىن ءماجىلىستىڭ جالپى وتىرىسىندا ەسىرتكىگە قارسى ءىس-قيمىل جۇيەسىن جەتىلدىرۋگە باعىتتالعان قۇجات ءبىرىنشى وقىلىمدا قارالدى.

وسى زاڭ جوباسى اياسىندا ەسىرتكى وندىرەتىندەردى جانە ەسىرتكى زەرتحانالارىن قۇرعانداردى ءومىر بويىنا باس بوستاندىعىنان ايىرۋ ۇسىنىلدى، دەپ حابارلايدى Almaty-akshamy.kz.

«ءبىز وسى زاڭ جوباسىنا قولداۋ بىلدىردىك، سەبەبى قازىرگى جاعداي جازانى كۇشەيتۋدى تالاپ ەتىپ وتىر. ەندى جازانى سارالاۋ ۇسىنىلىپ وتىر. ەلىمىزدە ءقازىر ەسىرتكىنى جاسىراتىندار ەسىرتكى وندىرۋشىمەن بىردەي جازا الادى. بۇل زاڭ تالاپتارىن كۇشەيتسەك، بىزدە سارالانعان جازا ەنگىزىلىپ، ەسىرتكى وندىرەتىندەر 15 جىلدان ءومىر بويىنا باس بوستاندىعىنان ايىرۋ جازاسىنا تارتىلۋى مۇمكىن. ياعني ەسىرتكى جاسىراتىندارعا قاتىستى بۇرىنعى جاۋاپكەرشىلىك ساقتالادى، ال زەرتحانا قۇرعاندارعا جازا كۇشەيتىلمەك. زاڭ جوباسى ءبىرىنشى وقىلىمدا ماقۇلداندى. ەندى بۇل ۇسىنىستار تالقىلانادى»، - دەدى ىشكى ىستەر ءمينيسترىنىڭ ورىنباسارى ايدوس رىسبايەۆ.

ونىڭ ايتۋىنشا، ەلىمىزدە جالپى 36 مىڭ ادام تۇرمەدە وتىر. سونىڭ 4 مىڭنان استامى ەسىرتكى قىلمىسىنا قاتىستى جازاسىن وتەپ جاتىر.