جىل باسىنان بەرى قازاقستاندا جالپى اۋدانى 12 316،3 مىڭ م2 بولاتىن 31 مىڭنان استام نىسان پايدالانۋعا بەرىلدى
جىل باسىنان قازاقستاندا 31 مىڭنان استام نىسان پايدالانۋعا بەرىلدى. ونىڭ ىشىندە تۇرعىن ءۇي، دەنساۋلىق ساقتاۋ، ءبىلىم بەرۋ جانە وزگە دە نىساندار بار. Almaty-akshamy.kz بۇل تۋرالى ۇلتتىق ستاتيستيكا بيۋروسىنا سىلتەمە جاساپ حابارلايدى.
جىل باسىنان بەرى قازاقستاندا جالپى اۋدانى 12 316،3 مىڭ م2 بولاتىن 31 مىڭنان استام نىسان پايدالانۋعا بەرىلدى.
2022 جىلدىڭ قاڭتار-قىركۇيەك ايلارىندا قۇرىلىس جۇمىستارىنىڭ كولەمى 3 989،9 ملرد تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 5،1% جوعارى.
رەسپۋبليكا بويىنشا قۇرىلىس جۇمىستارىنىڭ جالپى كولەمىنىڭ 83،8% - جەكە قۇرىلىس ۇيىمدارى، 16،1% –شەتەلدىك جانە 0،1% - مەملەكەتتىك ۇيىمدار ورىنداعان.
قۇرىلىس جۇمىستارى كولەمىنىڭ ەڭ جوعارى ءوسىمى تىركەلگەن وڭىرلەر:
- شىمكەنت قالاسى – 39،7%؛
- قىزىلوردا وبلىسى – 35،1%؛
- اقمولا وبلىسى – 26،9%؛
- الماتى وبلىسى – 14،5%؛
قۇرىلىس جۇمىستارىنىڭ كولەمى ازايدى:
- قاراعاندى وبلىسىندا – 10،7%؛
- اباي وبلىسىندا – 23%؛
- ماڭعىستاۋ وبلىسىندا – 34،7%.
پايدالانۋعا بەرىلگەن نىسانداردىڭ 90،8 پايىزى تۇرعىن ءۇي سەكتورىنا تيەسىلى، بۇل 28 مىڭنان استام تۇرعىن ءۇي نىسانى. ودان كەيىنگى ورىندا ماگيسترالدىق جانە جەرگىلىكتى قۇبىرلار، بايلانىس جەلىلەرى، ەنەرگەتيكا جەلىلەرى، قوسالقى نىساندار تۇر – 1169 نىسان. ساۋدا نىساندارى ءۇشىنشى ورىندا، جىل باسىنان بەرى 513 وبەكتى پايدالانۋعا بەرىلدى.
ءبىلىم بەرۋ جانە دەنساۋلىق ساقتاۋ سالاسىندا بيىلعى توعىز ايدا 38 جالپى ءبىلىم بەرەتىن مەكتەپ، 24 مەكتەپكە دەيىنگى ۇيىم، 3 اۋرۋحانا، سونداي-اق 6 امبۋلاتوريالىق ەمحانا ىسكە قوسىلدى.