قازاقستاندا ۋتيل الىمنىڭ ستاۆكاسى جەڭىلدەي ءتۇستى جانە وتانداستارىمىزدىڭ ءوز كولىگىنىڭ بولۋى ءۇشىن ارنايى باعدارلاما قابىلدانىپ جاتىر. وسى ورايدا اۆتوكولىك سالاسىنىڭ ماماندارى نە دەيدى؟ اتالعان ماسەلەگە قاتىستى قازاقستاننىڭ «اۆتوبيزنەس» قاۋىمداستىعىنىڭ ستراتەگيالىق دامۋ ءبولىمىنىڭ ديرەكتورى دارحان ايداۋىلوۆ پىكىر ءبىلدىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«ءبىز قاۋىمداستىق اتىنان ۋتيل الىمعا قاتىستى ءوز ويىمىز بەن ۇسىنىسىمىزدى بۇعان دەيىن دە ايتىپ كەلەمىز. بىرىنشىدەن، قازاقستان-بەلارۋس-رەسەي ەلدەرى اراسىندا ءبىرىڭعاي ۋتيليزاسيالىق جۇيە ورناعان. اتالعان جۇيەگە سايكەس جانە قازاقستان ەۋرازيالىق ەكونوميكالىق وداققا مۇشە ەل رەتىندە باسەكەگە قابىلەتتىلىگىن ساقتاپ قالۋ قاجەت. ەكىنشىدەن، ءار تاراپ، ياعني رەسەي بولسىن، بەلارۋس بولسىن، ولار ىشكى نارىعىنىڭ قامىن ويلايدى. ونىڭ ەكى مەحانيزمى بار: تاريفتىك جانە تاريفتىك ەمەس. تاريفتىك مەحانيزم دەگەنىمىز - ىشكى نارىقتاعى ۋتيل الىمى، ال تاريفتىك ەمەس دەگەن ءسوز - تەحنيكالىق رەتتەۋ. اتالعان ەلدەر اراسىندا ءبىرىڭعاي كەلىسىم بولعاندىقتان، قوسىمشا قۇن سالىعى تولەنبەيدى»، - دەدى دارحان ايداۋىلوۆ.
سونداي-اق، مامان جاڭا ەنگىزىلگەن اۆتونەسيە باعدارلاماسىنا قاتىستى ويىن ورتاعا سالدى.
«وتاندىق كولىكتەردى ساتىپ الۋ ءۇشىن 100 ملرد تەڭگە جەڭىلدەتىلگەن اۆتونەسيە بەرۋ - حالىق ءۇشىن ۇلكەن قولداۋ. سەبەبى ەلىمىزدە ساتىلاتىن اۆتوموبيلدەردىڭ 75 پايىزى - بيۋدجەتتىك كولىكتەر. وسى تۇرعىدان العاندا اتالعان ماسەلە حالىقتىڭ مۇددەسىنە وراي شەشىلىپ وتىر. جاڭاشىلدىق حالىق يگىلىگىنە جارايدى دەگەن سەنىمدەمىن»، - دەيدى ول.
ونىڭ ايتۋىنشا، ەلىمىزدە اۆتوكولىك نارىعى جىل ساناپ ءوسىپ كەلەدى.
«قازاقستاندا جاڭادان ساتىلاتىن كولىكتەردىڭ ۇلەسى ءوسىپ كەلە جاتىر. سونىمەن قاتار ەلىمىزدە كولىك يەسىنىڭ دە سانى ارتىپ كەلەدى. ياعني، ءار وتباسىندا ءبىر كولىكتەن بار دەسەك تە بولادى. سوڭعى ۋاقىتتا ەنگىزىلىپ جاتقان جاڭاشىلدىقتار قازاقستاندىقتاردىڭ ءوز كولىگى بولۋىنا مۇمكىندىك جاساپ وتىر. اۆتوكولىككە قاتىستى تاعى ءبىر ماڭىزدى جايت، قازاقستان الىپ-ساتار ەل بولا ما الدە يندۋستريالىق ايماققا اينالا ما؟ وسى ماسەلەنىڭ باسىن بۇگىن اشۋ كەرەك. ياعني ءىستىڭ اق-قاراسىن ايىرىپ، ونى حالىققا جەتكىزۋ قاجەت»، - دەدى د. ايداۋىلوۆ.