قازاقستان حالقىنىڭ سانى 19 644 067 ادامدى قۇرادى
قازاقستان حالقىنىڭ سانى 2022 جىلعى 1 تامىزداعى دەرەك بويىنشا 19 644 067 ادامدى قۇرادى، دەپ حابارلايدى Almaty-akshamy.kz ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسىنا سىلتەمە جاساپ.
وڭدەلگەن مالىمەتتەرگە سايكەس، 2021 جىلعى ساناققا 19 186 015 ادام قاتىستى. وسىلايشا، 2009 جىلعى حالىق ساناعىنان بەرى ەل حالقى 20%-عا نەمەسە 3،2 ملن ادامعا ءوستى. بۇعان حالىقتىڭ تابيعي ءوسىمى مەن قازاقستان اۋماعىنا كوشى-قون اعىنى ىقپال ەتتى.
ساناق قورىتىندىسى بويىنشا قالا تۇرعىندارىنىڭ ۇلەسى 61،2%-عا دەيىن ءوستى، الدىڭعى ساناق مالىمەتتەرىمەن سالىستىرعاندا ءوسىم 5%-دى قۇرادى. تيىسىنشە، اۋىل حالقىنىڭ ۇلەسى 43،9%-دان 38،8%-عا دەيىن ازايدى. قالا تۇرعىندارىنىڭ باسىم بولىگى قاراعاندى وبلىسىندا تۇرادى – تۇرعىنداردىڭ 80%-ى، ياعني 1 ملن-نان استام ادام. كەرىسىنشە، قالالىقتار سانى ەڭ از ايماق – تۇركىستان وبلىسى. مۇندا بارلىعى 498 مىڭ ادام نەمەسە وبلىس تۇرعىندارىنىڭ 24،3%-ى قالالىق جەردە تۇرادى.
«ۋربانيزاسيا – ەكونوميكانىڭ يندۋستريالاندىرىلۋى مەن جۇمىس كۇشىنىڭ ءونىمدى سالالارعا اۋىسۋىنا بايلانىستى بولاتىن الەمدىك پروسەسس. ادەتتە، ازاماتتار اۋىلدان قالاعا ءبىلىم الۋ، ماماندىعى بويىنشا جۇمىس ىستەۋ جانە ءال-اۋقاتىن جاقسارتۋ ءۇشىن كوشەدى. سوڭعى ەكى ساناق ارالىعىنداعى كەزەڭدە قالا حالقىنىڭ ەڭ كوپ ءوسىمى ەلىمىزدىڭ 6 وڭىرىندە بايقالدى – اقمولا، اقتوبە، بقو، شقو، سقو، قىزىلوردا وبلىستارىندا. ال ەلوردا حالقى ەكى ەسە ءوستى»، – دەيدى ق ر سجرا ۇلتتىق ستاتيستيكا بيۋروسىنىڭ باسشىسى جاندوس شايماردانوۆ.
الدىڭعى ساناق قورىتىندىسى بويىنشا نۇر-سۇلتاندا 619 مىڭ ادام تۇرىپ جاتقان، 2021 جىلعى ساناق كەزىندە ەلىمىزدىڭ باس قالاسىنداعى حالىق سانى 1،23 ملن ادامدى قۇرادى.
قازاقستانداعى ايەلدەر سانى بۇرىنعىداي ەرلەر سانىنان باسىم. ساناق قورىتىندىسى بويىنشا ولاردىڭ سانى جارتى ميلليونعا (536،3 مىڭ ادامعا) ارتىق بولدى. ەگەر پايىزبەن ايتار بولساق، ەرلەر ۇلەسى – 48،6% (9 324 840 ادام)، ايەلدەر ۇلەسى – 51،4% (9 861 175 ادام) قۇرادى. وسىلايشا، قازاقستانداعى 100 ايەلگە 99 ەر ادامنان كەلەدى.
ساناق 10 جىلدا ءبىر رەت جۇرگىزىلەدى جانە بەلگىلى ءبىر كەزەڭدەگى حالىقتىڭ ءتۇرلى الەۋمەتتىك-ەكونوميكالىق پارامەترلەرىن كورسەتەدى. جينالعان دەرەكتەر ۇسىنىلعان اقپاراتتىڭ تولىقتىعى (كوشى-قون، تابىس، جۇمىسپەن قامتۋ، نەكە جاعدايى، تۋۋ، تىلدەردى مەڭگەرۋ دارەجەسى، دىنگە قاتىناسى) مەن رەسپوندەنتتەردىڭ قامتىلۋى بويىنشا بىرەگەي بولىپ تابىلادى.
2021 جىلعى ساناق دەرەكتەرى مەن قازاقستان حالقىنىڭ سانى بويىنشا اعىمداعى دەرەكتەردى ەسكەرە وتىرىپ جۇرگىزىلگەن ەسەپتەۋدەن كەيىن 2022 جىلعى 1 تامىزداعى جاعداي بويىنشا ەلىمىزدىڭ حالقىنىڭ سانى 19 644 067 ادامدى قۇرادى.
ايتا كەتەيىك، ساناقتىڭ قىسقارتىلعان قورىتىندىلارى وڭىرلەر بويىنشا 2021 جىلعى دەرەكتەردى، ياعني 3 وبلىس بولىنگەنگە دەيىنگى ستاتيستيكانى كورسەتەدى.
ساناقتىڭ قىسقا قورىتىندىسى بويىنشا مالىمەتتەردى سىلتەمە بويىنشا كورۋگە بولادى.