قمدب ءتوراعاسى بۇگىنگىدەي سىن ساعاتتا ادامدار بىر-بىرىنە قامقور بولا ءتۇسۋ كەرەكتىگىن ايتتى
پاندەميالىق جاعداي ءدىن وكىلدەرىنىڭ رۋحاني الەمىن السىرەتە العان جوق. بۇل تۋرالى الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءحىح وتىرىسىندا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ادامزات بالاسى سان عاسىرلىق تاريحىمىزدا تالاي سىندارلى ساتتەر مەن سىناقتاردى، زوبالاڭ زاماندار مەن ناۋبەتتەردى باستان كەشىپ كەلەدى. الەمدى ۇرەيلەندىرگەن قازىرگى سىن ساتتە دە ادام مەن حاۋانىڭ ۇرپاقتارى قابىرعامىزدى قايىستىرماي، ۇمىتسىزدىككە بوي الدىرماي، بىر-بىرىمىزگە قامقور ءارى تىرەكشى بولا ءبىلۋىمىز قاجەت. بۇگىندە ۇرەي قۇشاعىنا ەنىپ، ەلەڭ-الاڭ كۇي كەشكەن ءار ادام ءۇشىن جىلى ءسوزدىڭ ءوزى جانعا داۋا، كوڭىلگە مەدەۋ بولىپ تۇر. بۇل تۇستا ءدىندارلار مەن ءدىن ليدەرلەرىنىڭ ءرولى وراسان زور بولىپ وتىر»، - دەدى قمدب ءتوراعاسى.
باس ءمۇفتي قازاق حالقىندا «بەتەگە كەتسە، بەل قالار، بەرەكەڭ كەتسە، نەڭ قالار؟» دەگەن اتالى ءسوز بار ەكەندىگىن ەسكە سالدى.
«اللا ەلشىسى ايتقانداي، جاقسى سويلەپ، اينالاداعى ادامدارعا شۋاق شاشىپ، ۇرەيگە ەمەس، ۇمىتكە قانات بىتىرە بىلسەك قانا، الەمدىك پاندەميانى جەڭەرىمىز انىق. مەنىڭ ويىمشا، الەمدەگى پاندەميالىق جاعداي ءدىن وكىلدەرىنىڭ رۋحاني الەمىن السىرەتە العان جوق. پاندەميا ۋاقىتىندا مەشىتتەر مەن عيباداتحانالار ەسىگى جابىلعانىمەن، ساۋاپ ەسىگى جابىلمايتىنى سەكىلدى، ءدىن قىزمەتكەرلەرى قوعامدا ىزگىلىك پەن مەيىرىم سىندى قۇندىلىقتاردى كەڭىنەن ناسيحاتتاي ءبىلدى»، - دەدى ناۋرىزباي قاجى تاعان ۇلى.