ونسىز تەحنولوگيالىق ەگەمەندىك بولمايدى
ەۋرازيالىق ەكونوميكالىق وداق ەلدەرى وداق اياسىندا ەۋروپالىق ءبىلىم بەرۋ باعدارلامالارىنا ۇقساس اكادەميالىق الماسۋ باعدارلامالارىن قۇرا الادى، دەپ حابارلايدى Almaty-akshamy.kz
بۇل تۋرالى ماسكەۋدە ءوتىپ جاتقان ەۋرازيالىق ەكونوميكالىق فورۋم بارىسىندا ەۋرازيالىق ەكونوميكالىق كوميسسيانىڭ ونەركاسىپ جانە اگروونەركاسىپتىك كەشەن جونىندەگى القا مۇشەسى ارتاك كاماليان ايتتى.
كامالياننىڭ ايتۋىنشا، عىلىمي-زەرتتەۋ ىنتىماقتاستىعىن دامىتۋ جانە تەحنولوگيالىق ەگەمەندىكتىڭ العىشارتتارىن قۇرۋ باعدارلامانىڭ ماقساتى بولماق.
"عىلىم، ءبىلىم، ازىرلەمە، عىلىمي-زەرتتەۋ تاجىريبەسى بويىنشا ەلدەر اراسىندا ىنتىماقتاستىق جوق. بۇل ءبىزدىڭ ەلدەر اراسىنداعى كەلىسىممەن ەشقانداي رەتتەلمەگەن، ونسىز تەحنولوگيالىق ەگەمەندىككە قول جەتكىزۋ مۇمكىن ەمەس"، - دەدى ول.
كاماليان اقش-تىڭ Fulbright اكادەميالىق الماسۋ باعدارلاماسىن، سونداي-اق ەۋروپالىق Erasmus Mundus باعدارلاماسىن مىسالعا كەلتىردى.
"نەگە ءبىز ەاەو-دا وسىنداي باعدارلامالار جاسامايمىز؟ بۇل تەحنولوگيالىق ەگەمەندىكتىڭ نەگىزىنە اينالۋى مۇمكىن"، - دەدى ول.
كاماليان ەەك كەلىسىمىندە مۇنداي وكىلەتتىكتەر جوق ەكەنىن ءتۇسىندىردى.
"ءبىز بۇل وكىلەتتىكتەردى كەلىسىمشارتقا ەنگىزىپ، تەحنولوگيا، عىلىم جانە ءبىلىم سالاسىندا ىنتىماقتاستىق ورناتۋىمىز كەرەك. ونسىز تەحنولوگيالىق ەگەمەندىك بولمايدى"، - دەدى كاماليان.