الماتى اكىمى دارحان ساتىبالدى تۇركسىب اۋدانىنداعى ءبىرقاتار وندىرىستىك جانە لوگيستيكالىق نىساندى ارالاپ، ينۆەستيسيالىق جوبالاردىڭ جۇزەگە اسۋ بارىسىمەن، جاڭا جۇمىس ورىندارىنىڭ قۇرىلۋىمەن جانە ءوندىرىس ۇدەرىسىنە زاماناۋي تەحنولوگيالاردىڭ ەنگىزىلۋىمەن تانىستى.
العاشقى نىسان – زاماناۋي «Damiani» ۋاقىتشا ساقتاۋ قويماسى. كاسىپورىن جالپى قۇنى 7 ملرد تەڭگەدەن استام «ا» ساناتىنداعى قويما كەشەنىنىڭ ءبىرىنشى كەزەڭىن ىسكە اسىردى. ونىڭ اياسىندا 200-دەن استام جاڭا جۇمىس ورنى اشىلدى. قويما كەشەنى حالىقارالىق ستاندارتتارعا ساي جانە ەكولوگيالىق تيىمدىلىك بويىنشا BREEAM سەرتيفيكاتىنا يە (باعالاۋ دەڭگەيى – GOOD).
كەشەن اۋماعىندا الەمدىك جەتەكشى برەندتەر – Komatsu، Toyota Motors جانە سپورتماستەر ورنالاسقان. سونداي-اق، Toyota كومپانياسىنىڭ 1 مىڭ شارشى مەتر اۋماقتى قامتيتىن وقۋ ورتالىعى اشىلدى. مۇندا قازاقستان مەن قىرعىزستان اۆتوسالوندارىنىڭ قىزمەتكەرلەرى وقىتىلادى. قازىرگى ۋاقىتتا جوبانىڭ ەكىنشى جانە ءۇشىنشى كەزەڭى جۇزەگە اسىرىلىپ جاتىر، ونىڭ اياسىندا جالپى اۋدانى 37 مىڭ شارشى مەتر بولاتىن قويما عيماراتتارى سالىنادى. جالپى ينۆەستيسيا كولەمى 15 ملرد تەڭگەدەن اسادى.
كەلەسى نىسان – لوگيستيكالىق جانە قويما قىزمەتتەرىن كورسەتەتىن «ILP Group» ج ش س. كومپانيا جالپى اۋدانى 100 مىڭ شارشى مەتردەن اساتىن زاماناۋي لوگيستيكالىق پاركتەر جەلىسىن باسقارادى.
كاسىپورىندا 178 ادام ەڭبەك ەتەدى، ال 2024 جىلى سالىق تولەمدەرى 450 ملن تەڭگە بولدى. كومپانيانىڭ تۇتىنۋشىلارى قاتارىندا Sulpak، Air Astana، DHL، مەچتا ماركەت جانە OSG Records Management بار. قازىرگى ۋاقىتتا جالپى اۋدانى 32 مىڭ شارشى مەتر بولاتىن جاڭا قويما قۇرىلىسى قولعا الىنعان. ينۆەستيسيا كولەمى 13 ملرد تەڭگە، جوبا 2026 جىلدىڭ II توقسانىندا اياقتالادى.
سودان كەيىن قالا اكىمى «ينتەر مۋلتي سەرۆيس» ج ش س كاسىپورنىنىڭ جۇمىسىمەن تانىستى. بۇل قاعاز جانە كارتون قاپتاماسىنىڭ جەتەكشى ءوندىرۋشىسى. كاسىپورىن 1995 جىلدان بەرى جۇمىس ىستەيدى جانە قايتا وڭدەلگەن شيكىزاتتان ءونىم شىعارىپ، قازاقستان مەن تمد ەلدەرىنىڭ نارىعىن قامتاماسىز ەتەدى، وسىلايشا ەكولوگيالىق تۇراقتىلىققا ۇلەس قوسىپ وتىر.
مۇندا 250 قىزمەتكەر جۇمىس ىستەيدى. كاسىپورىن جىل سايىن 36 مىڭ تونناعا دەيىن قاعاز جانە كارتون جانە 37 ملن م² گوفروونىم شىعارادى. كومپانيانىڭ سەرىكتەستەرى قاتارىندا Coca-Cola Kazakhstan، كاز سنەك ساۋدا، Kulikov، سۇڭقار، Nauryz Agro KZ جانە الماتىلىق اشىتقى زاۋىتى بار.
جۇمىس ساپارىنىڭ سوڭعى نىسانى – «سۆس-مودۋل» ج ش س زاۋىتى. ول بلوكتى-مودۋلدىك عيماراتتار مەن مەتالل قۇرىلىمدار وندىرۋگە ماماندانعان. كاسىپورىن 2006 جىلدان باستاپ جۇمىس ىستەيدى جانە جىل سايىن 5 مىڭ تونناعا دەيىن مەتالل قۇرىلىمدارىن، سونداي-اق 50 مىڭ شارشى مەتر مودۋلدىك عيماراتتاردى شىعارادى.
زاۋىت قازسينك، ERG، كازاقمىس، KazMinerals سياقتى قازاقستاننىڭ ءىرى ونەركاسىپ كومپانيالارىمەن سەرىكتەستىك ورناتقان. ءوندىرىس الاڭى زاماناۋي جابدىقتارمەن جانە جەكە تەمىرجول ينفراقۇرىلىمىمەن قامتىلعان، بۇل ءونىمدى دايىنداۋدان باستاپ جونەلتۋگە دەيىنگى تولىق سيكلدى قامتاماسىز ەتەدى.
دارحان ساتىبالدى اتاپ وتكەندەي، وتاندىق وندىرۋشىلەردى قولداۋ جانە لوگيستيكالىق ينفراقۇرىلىمدى دامىتۋ – الماتىنىڭ ينۆەستيسيالىق تارتىمدىلىعىن ارتتىرۋ مەن ونەركاسىپتىك الەۋەتىن كۇشەيتۋدىڭ نەگىزگى باعىتتارىنىڭ ءبىرى.
اكىم ەكولوگيالىق تەحنولوگيا ەنگىزۋ، ەكسپورتتىق مۇمكىندىكتەردى كەڭەيتۋ جانە جاڭا جۇمىس ورىندارىن اشۋ قالانىڭ ەكونوميكاسىن ورنىقتى دامىتۋعا زور ۇلەس قوساتىنىن اتاپ ءوتتى.