الماتىنىڭ اۋەزوۆ اۋدانىندا جاڭا قوعامدىق كەڭىستىك اشىلدى

الماتى اكىمى باقىتجان ساعىنتايەۆ جۇمىس ساپارى كەزىندە اۋەزوۆ اۋدانىنداعى "التىن بەسىك" شاعىناۋدانىنا باردى. مۇنداعى قاراۋسىز قالعان الاڭقايلاردا ويىن جانە سپورت الاڭدارى جابدىقتالىپ، اباتتاندىرۋ جانە كوگالداندىرۋ جۇمىستارى جۇرگىزىلدى، دەپ حابارلايدى Almaty-akshamy.kz

باقىتجان ساعىنتايەۆ "التىن بەسىك" شاعىناۋدانىنىڭ ترۋدوۆايا كوشەسىندەگى قوعامدىق كەڭىستىكتىڭ اباتتاندىرىلۋىمەن جانە جاسالۋىمەن تانىستى. بۇرىندارى اۋماعى 9 مىڭ شارشى مەتر بولاتىن الاڭ قاراۋسىز قالعان ەدى. الماتى اكىمىنىڭ تاپسىرماسى بويىنشا الاڭ تازارتىلدى، ترەناجەرلەرى، تەننيس ۇستەلدەرى، ۆوركاۋت-ايماعى بار سپورت الاڭى ۇيىمداستىرىلدى. سونداي-اق، فۋتبول جانە باسكەتبول، سكەيت الاڭدارى، بالالاردىڭ ويىن ايماعى قاراستىرىلعان. جارىقتاندىرىلىپ، بەينەباقىلاۋ ورناتىلعان. 

ەسكە سالساق، بۇدان بۇرىن وسى شاعىناۋدانىنىڭ انەت بابا كوشەسىندە اباتتاندىرىلعان كەڭىستىك اشىلىپ، وندا جاتاقحانا سالۋ جوسپارلانعان بولاتىن. قالا اكىمى باقىتجان ساعىنتايەۆ اۋدان تۇرعىندارىنىڭ وتىنىشتەرىنەن كەيىن شەشىم قابىلدادى.  

ءقازىر مۇندا فۋتبول جانە باسكەتبول الاڭدارى، جۇگىرۋ جولدارى بار سپورت الاڭى، بالالارعا ارنالعان ويىن الاڭى، ۆوركاۋت-ايماق جانە سكەيت-الاڭ سالىندى. اۋماق اباتتاندىرىلىپ، جارىقتاندىرىلدى، ۋرنالار مەن ورىندىقتار قويىلدى، بۇتالار مەن اعاشتار وتىرعىزىلدى. جاقىن جەرگە 120 ورىندىق بالاباقشا سالىنادى. ۋچاسكەنىڭ ءبىر بولىگى ساياباق اۋماعى رەتىندە اباتتاندىرىلىپ، كىشى ساۋلەت پىشىندەرى قويىلىپ، گۇلزارلار جاسالدى.