ەكوناۋقانعا قالا تۇرعىندارى، ەرىكتىلەر، ستۋدەنت جاستار، ەكولوگيا بەي-جاي قاراي المايتىن جاناشىر جاندار قاتىستى.
اتالعان ءىس-شارا قاتارىنان 20-شى رەت ۇيىمداستىرىلىپ وتىر.
ەكواكسيا اياسىندا كوپشىلىكتەن ءارتۇرلى زاتتار سونىڭ ىشىندە: كيىم، كىتاپتار، اياق كيىم، تۇرمىستىق زاتتار جانە ت.ب. قايرىمدىلىق ۇيىمدارىنا بەرۋ ءۇشىن قابىلداندى. سونداي-اق كىتاپ الماسۋ، ۆينيل پلاستينكالارىمەن الماسۋ، اشىق شەبەرلىك ساباقتارى قاراستىرىلعان. سونىمەن قاتار قابىلدانعان قايتا وڭدەۋگە جارامدى زاتتاردىڭ تىزىمىندە كادىمگى پلاستيك پەن ماكۋلاتۋرادان باسقا ەلەكتروندى قالدىقتار، قۇرامىندا سىناپ بار قالدىقتار، جارامدىلىق مەرزىمى ءوتىپ كەتكەن دارى-دارمەكتەر، بانكالار مەن ءتۇرلى-تۇستى شىنى سياقتى سيرەك فراكسيالار دا بار.
بۇعان دەيىنگى ەكوناۋقان قالا تۇرعىندارىنىڭ مۇنداي ءىس-شارالارعا دەگەن بەلسەندىلىگىن، سۇرانىسىن ايقىن كورسەتتى. ءىس-شارانىڭ بار بولعانى 4 ساعاتىندا 2 تونناعا جۋىق قايتا وڭدەلەتىن ماتەريالدار مەن 3000 كگ قايتا وڭدەۋگە ارنالعان زاتتار جينالدى. ءىس-شاراعا 1500-دەن استام ادام قاتىستى.
بۇل ەكو-اكسيالار، شىن مانىندە، قايتا وڭدەلەتىن ماتەريالداردى ماكسيمالدى كولەمدە قايتا وڭدەۋگە، قاجەتسىز زاتتاردى قورشاعان ورتاعا زالالسىزداندىرۋعا، جاڭا داعدىعا ۇيرەنۋگە، پىكىرلەس ادامدارمەن قارىم-قاتىناسقا تۇسۋگە جانە ەكولوگيالىق قوعامداستىقتان قولداۋ تابۋعا بىرەگەي مۇمكىندىك بولىپ تابىلادى.
«نەگىزگى مۇددە - بۇقارانى ەكولوگيالىق تازالىقتى ساقتاۋعا، سونداي-اق ەكوبەلسەندىلىكتى ارتتىرۋعا شاقىرۋ. ەگەر ءاربىر جان ءوز اۋلاسىن، تۇرىپ جاتقان مەكەنىن تازا ۇستاسا، تازالىقتى بالاباقشا، مەكتەپ جاسىنان باستاپ ۇيرەتسە، نۇر ۇستىنە نۇر بولار ەدى»، - دەدى ەكولوگ مامان پاكيزات سايلاۋبەكوۆا.
