الماتىداعى قۇرمانعازى اتىنداعى قازاق ۇلتتىق حالىق اسپاپتار وركەسترىندە «عاسىرلار پەرنەسى» اتتى كونسەرت ءوتتى. مەرەكەلىك كەش اكادەميك، قازاق مۋزىكا ونەرىنىڭ كاسىبي نەگىزىن قالاۋشى احمەت جۇبانوۆتىڭ 120 جىلدىق مەرەيتويىنا ارنالدى.
بيىل قازاق كسر حالىق ءارتىسى، كورنەكتى عالىم، كومپوزيتور، ديريجەر، ونەرتانۋ عىلىمىنىڭ دوكتورى، پروفەسسور، اكادەميك احمەت جۇبانوۆتىڭ تۋعانىنا 120 جىل. ول 1934 جىلى 11 ادامنان تۇراتىن دومبىراشىلار ءانسامبلىنىڭ نەگىزىندە بۇگىندە ايگىلى قۇرمانعازى اتىنداعى قازاق ۇلتتىق حالىق اسپاپتار وركەسترىن قۇرىپ، العاشقى كوركەمدىك جەتەكشىسى ءارى باس ديريجەرى بولدى.
عالىم ۇلتتىق مۋزىكاعا تەرەڭ عىلىمي زەرتتەۋلەر جۇرگىزىپ، قازاقتىڭ كۇي ونەرىن جاھانعا تانىتتى. كونسەرتتى وركەستردىڭ باس ديريجەرى، «قۇرمەت» وردەنىنىڭ يەگەرى ابىلاي تىلەپبەرگەن باسقاردى.
– كونسەرت احمەت جۇبانوۆقا تاعزىم رەتىندە ونىڭ ءوز رەپەرتۋارىنان باستالدى. باعدارلامادا كومپوزيتوردىڭ كۇيلەرى مەن اندەرى، لاتيف حاميديمەن بىرلەسىپ جازعان وپەراسىنان ۇزىندىلەر، سونداي-اق قۇرمانعازى اتىنداعى وركەسترمەن بىرگە ونەر كورسەتەتىن سوليستەردىڭ ورىنداۋى بولدى. سولاردىڭ قاتارىندا اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى ايدوس جاباعين دە بار. وركەستر تىزگىنىن مەنەن بولەك مادەنيەت سالاسىنىڭ ۇزدىگى ەرلان داۋرەنبەكوۆ پەن قازاقستاننىڭ ەڭبەك سىڭىرگەن قايراتكەرى نۇركەن ءاشىروۆ ۇستادى. رەپەرتۋارعا احمەت جۇبانوۆتىڭ حالىق اندەرى مەن كۇيلەرى ەنگىزىلدى. مۋزىكالىق ۇجىم جاڭا جىلدان بەرى اسقان جاۋاپكەرشىلىكپەن دايىندالدى. ساحنادا 80-گە جۋىق ءارتىس ونەر كورسەتتى، – دەدى ابىلاي تىلەپبەرگەن.
مەرەيتوي اياسىندا ق ر ۇلتتىق ورتالىق مۋزەيىنىڭ قۇرامىنداعى احمەت جانە عازيزا جۇبانوۆتاردىڭ مەموريالدىق مۋزەيىنىڭ «ۇلت رۋحىن اسقاقتاتقان تۇلعا» اتتى كورمە ۇيىمداستىرىلدى.
– كورمەنىڭ ماقساتى – قازاق مۋزىكاسىنىڭ ۇلى تۇلعاسى، كومپوزيتور، اكادەميك، ايگىلى ديريجەر، عالىم، قوعام قايراتكەرى احمەت جۇبانوۆتىڭ ءومىر جولى مەن مول شىعارماشىلىق مۇراسىن كەڭىنەن ناسيحاتتاۋ. كورمە ارقىلى كەلۋشىلەرگە قازاق مۋزىكاسىنىڭ دامۋ تاريحىنا احمەت جۇبانوۆتىڭ قوسقان ولشەۋسىز ۇلەسىن كەڭىنەن تانىستىرىپ، رۋحاني-مادەني قۇندىلىقتاردى دارىپتەۋ كوزدەلدى. ۇلتقا ادال قىزمەت ەتكەننىڭ دالەلى – 1950 جىلعى نەمىس باسپا ماشيناسى. بۇل قۇرالعا قازاق ارىپتەرى ەنگىزىلگەن. ەكسپوزيسيادا احمەت جۇبانوۆتىڭ ءومىرى مەن شىعارماشىلىعىنا قاتىستى مۇراعاتتىق قۇجاتتار، سيرەك فوتوسۋرەتتەر، قولجازبالار، نوتالىق ەڭبەكتەر، كىتاپتار، جەكە زاتتار، سونداي-اق ونىڭ زامانداستارى مەن شاكىرتتەرى تۋرالى ماتەريالدار كوپشىلىك نازارىنا ۇسىنىلدى، – دەدى مۇراجاي جەتەكشىسى رىسكۇل ساعات قىزى.
اتالعان مادەني ءىس-شارا احمەت جۇبانوۆتىڭ قازاق كاسىبي مۋزىكاسىنىڭ قالىپتاسۋى مەن دامۋىنا قوسقان ولشەۋسىز ۇلەسىن كەڭىنەن ناسيحاتتاپ، ۇلتتىق ونەردىڭ رۋحاني قۇندىلىعىن تاعى ءبىر مارتە ايقىندادى.