قونايەۆ قالاسىندا ۇيىمداستىرىلعان تۋرنيرگە ەلىمىزدىڭ 5 وبلىسىنان 30-عا جۋىق پالۋان قاتىستى.
«تولاعاي» الىپتار جارىسىندا كىل مىقتىلار سالماعى 10 كيلوگرامم بولاتىن نايزانى لاقتىرۋ، جۋاندىعى 15 ميلليمەترلىك شويىن تەمىردى مويىنعا سالىپ مايىستىرۋدان كۇش سىناستى، دەپ حابارلايدى Almaty-akshamy.kz.
سونداي-اق سالماعى 141 كەلى بولاتىن اۋىر تاستى كوتەرىپ الىپ جۇرۋدەن، سونداي-اق 500 كەلى جۇك تيەلگەن اربانى سۇيرەۋدەن سىنعا ءتۇستى. باستى شارت - جاتتىعۋدى ەكى مينۋتتا ورىنداۋ قاجەت. ۇمىتكەرلەردىڭ اراسىندا اۋەسقويلار عانا ەمەس، الەمدىك ارەنالاردا ەل نامىسىن قورعاپ جۇرگەن كاسىپقوي سپورتشىلار دا بار. بۇل سايىستى بولاشاقتا حالىقارالىق دەڭگەيدە وتكىزۋ جوسپاردا بار. باستى ماقسات - سالاۋاتتى ءومىر سالتىن ناسيحاتتاپ قانا قويماي، قازاق باتىرلارىن تانىمال ەتۋ.
«قاجىمۇقان اتامىزدى بىلەسىزدەر، وسىلاردىڭ بارلىعىن جاساعان. 52 مەملەكەتتە 48 التىن مەدال العان ءبىزدىڭ بابامىزدىڭ ەڭبەگى قازىرگى تاڭدا جاستارعا ناسيحات. ۇيدە تەلەفوندى شۇقىلاپ وتىرعان جاستار وسىلاردى كورۋ كەرەك. الەمدەگى «ستروگمەن» دەگەن جارىستار بار. امەريكادا «ارنولد» دەگەن جارىستاردا قازاقتىڭ جىگىتتەرى كوك تۋدى جەلبىرەتىپ شىقسا ەكەن دەگەن ارمانىمىز بار»، - دەدى جوبا اۆتورى تيمۋر داۋلەتباق ۇلى.