قايىرىمدىلىق كەرۋەنى اتتاندى
وتقا ورانعان تورعاي وڭىرىندەگى اۋىلداردىڭ جۇرتشىلىعىنا مەملەكەت تاراپىنان ءتيىستى كومەكتەر ىستەلىپ جاتىر. الداعى كەزدەرى دە قولداۋدان كەندە بولمايتىنىن پرەزيدەنتتىڭ ءوزى ايتتى. سونىمەن بىرگە قاشاندا قايىرىمدىلىعىمەن ەرەكشەلەنەتىن قالىڭ ەل دە ورتتەن زارداپ شەككەن وتانداستارى ءۇشىن قولدان كەلگەن جاردەمنىڭ بارلىعىن جاساۋعا بىلەك سىبانا كىرىستى، دەپ حابارلايدى Almaty-akshamy.kz ايقىن گازەتىنە سىلتەمە جاساپ.
ەل باسىنا كۇن تۋعاندا الماتى وبلىسى دا سىرت قالمادى. العاشقىلاردىڭ ءبىرى بوپ، اۋليەكول اۋدانىنىڭ تۇرعىندارىنا ءبىرىنشى كەزەكتە قاجەتتى بولىپ سانالاتىن ازىق-تۇلىك، تازالىق زاتتارى مەن قۇرىلىس ماتەريالدارى جانە تاعى باسقا دا كەرەكتى زاتتاردى جونەلتتى.
بۇگىن الماتى وبلىسىنان جاساقتالعان قايىرىمدىلىق كەرۋەنى جالپى سالماعى 105 توننادان استام ازىق-تۇلىك پەن تاعى دا باسقا دۇنيەلەردى تيەپ الىپ، قوستاناي وبلىسىنا اتتاندى. الماتى وبلىسىنىڭ تۇرعىندارى وسىلايشا حالىق باسىنا تۇسكەن ورتاق اۋىرتپالىقتى بارىنشا جەڭىلدەتۋگە ءوز ۇلەستەرىن قوسۋدا.
قونايەۆ قالاسىنداعى فرونت كەڭسەنىڭ باسشىسى ەراسىل تولىمبەك ۇلىنىڭ ايتۋىنشا، الماتى وبلىسىنىڭ اكىمدىگى قوستاناي وبلىسىنىڭ ءتيىستى مەكەمەلەرىمەن الاپات ءورتتىڭ ءبىرىنشى كۇنىنەن باستاپ تۇراقتى بايلانىس ورناتىپ، ەلگە ۇندەۋ تاستاپ قايىرىمدىلىق كومەك جيناعان.
«قوستاناي وبلىسىندا بولعان اپاتتى جاعدايدى بۇكىل ەلگە كەلگەن سىناق رەتىندە قابىلدادىق. وسىنداي قيىن-قىستاۋ ساتتە قازاقستاندىقتاردىڭ اۋىزبىرشىلىك كورسەتىپ جاتقانى قۋانتادى. ەل پرەزيدەنتى قاسىم-جومارت توقايەۆ تا اپاتتى ايماققا ارنايى بارىپ، ورتتەن زارداپ شەككەندەردىڭ وتباسىلارىمەن جەكە-جەكە كەزدەسىپ، بىردە-بىر وتباسىنىڭ جاردەمسىز قالمايتىنىن، ۇكىمەت تاراپىنان بارلىق قاجەتتى كومەكتەر بولاتىنىن ايتتى.
اۋليەكول اۋدانىنداعى ورتتەن زارداپ شەككەندەرگە كومەك كورسەتۋ جونىندەگى جالپىحالىقتىق اكسياعا ءۇن قوسقان الماتى وبلىسى ءبىرىنشى قايىرىمدىلىق كەرۋەنىمەن 9 مىڭ دانا بالالارعا ارنالعان جايالىق، 10 توننا قۇرىلىس ماتەريالدارى، 10 توننا كۇنباعىس مايى، 10 توننا تاۋىق ەتى، 3 توننا كەسپە، 7 توننا پياز، 5 توننادان الما مەن كۇرىش جانە تاعى باسقا دا توتەنشە جاعدايدا شۇعىل قاجەت بولاتىن زاتتاردى جونەلتتى. ءبىرقاتار مەملەكەتتىك ورگاندارداعى قىزمەتكەرلەر ءوز ەرىكتەرىمەن بىركۇندىك جالاقىلارىن قايىرىمدىلىق كومەككە اۋداردى. جۇك تيەلگەن كولىكتەرمەن بىرگە 10 ەرىكتى تورعايلىقتارعا كومەكتەسۋگە كەتتى.