Smart City بويىنشا ءادىسناما جاسالادى
جۇڭگو حالىق رەسپۋبليكاسىنىڭ قازاقستانداعى باس كونسۋلى سزيان ۆەي حانىممەن كەزدەسۋ بارىسىندا ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى نىعايتۋ، سونداي-اق يننوۆاسيالار مەن جاڭا تەحنولوگيالار سالاسىنداعى ارىپتەستىك ماسەلەلەرى تالقىلاندى، دەپ حابارلايدى Almaty-akshamy.kz.
جۇڭگو قازاقستاننىڭ نەگىزگى ساۋدا سەرىكتەستەرىنىڭ تىزىمىنە كىرەدى. الماتى قالاسى مەن جۇڭگو اراسىنداعى تاۋار اينالىمى جەدەل قارقىنمەن وسۋدە. ماسەلەن، اعىمداعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا تاۋار اينالىمى 2021 جىلدىڭ وسى كەزەڭىمەن سالىستىرعاندا 51،6%-عا ارتىپ، 2 ملرد 850 ملن اقش دوللارىن قۇرادى.
بۇگىندە الماتىدا جۇڭگو كاپيتالىنىڭ قاتىسۋىمەن 898 كاسىپورىن جۇمىس ىستەيدى. ۇلكەن ديامەترلى بولات دانەكەرلەنگەن قۇبىرلار شىعاراتىن زاۋىت بىرلەسكەن ماڭىزدى جوبالاردىڭ ءبىرى بولدى. ونى ىسكە قوسۋ ناتيجەسىندە 2021 جىلى 300-دەن استام جۇمىس ورنى قۇرىلدى. ينۆەستيسيا كولەمى 33 ملرد تەڭگەنى قۇرادى. اعىمداعى جىلدىڭ سوڭىنا دەيىن يندۋستريالدى ايماقتا رادياتورلار ءوندىرۋ بويىنشا تاعى ءبىر ينۆەستيسيالىق جوبانى ىسكە اسىرۋ كۇتىلۋدە. بۇل جوباعا سالىنعان ينۆەستيسيا كولەمى 11،6 ملرد تەڭگەنى قۇرايدى، 430 جاڭا جۇمىس ورنى اشىلادى.
وتكەن جىلى الماتى قالاسىنىڭ سىچۋان پروۆينسياسىمەن ىنتىماقتاستىق تۋرالى جاسالعان مەموراندۋمدى ەسكەرە وتىرىپ، جۇڭگو ينۆەستورلارىن عىلىم مەن ءبىلىم سالاسىندا جانە ساۋدا-ەكونوميكالىق، مادەني قاتىناستاردى جانداندىرۋعا كەڭىنەن تارتۋ ۇسىنىلدى.
جاڭا تەحنولوگيالاردى دامىتۋ، سيفرلاندىرۋ جۇمىستارى اياسىندا وتكەن جىلدىڭ جەلتوقسان ايىندا الماتى مەن شەنچجەن قالالارى اراسىندا ءوزارا تۇسىنىستىك تۋرالى مەموراندۋم جاسالدى. اعىمداعى جوسپارلاردا ەكى قالانىڭ جەرگىلىكتى يت-بيزنەسىن قولداۋ ءۇشىن ءوزارا پرەفەرەنسيالار قۇرىلادى جانە Smart City سيفرلاندىرۋدىڭ ينفراقۇرىلىمدىق جوبالارىن ەنگىزۋ بويىنشا ءادىسناما جاسالادى.
كەزدەسۋ سوڭىندا تاراپتار ءوزارا ءتيىمدى ىنتىماقتاستىقتى ودان ءارى دامىتاتىن ايتارلىقتاي الەۋەت پەن پەرسپەكتيۆالىق باعىتتاردى اتاپ ءوتتى.