شانحايدا الماتى اكىمى دارحان ساتىبالدى مەن شانحاي مەرى گۋن چجەن جۇمىس بابىمەن كەزدەستى. تاراپتار ەكى مەگاپوليستىڭ ساۋدا-ەكونوميكالىق، ينۆەستيسيالىق جانە مادەني-گۋمانيتارلىق ءوزارا ءىس-قيمىلىنىڭ نەگىزگى باعىتتارىن تالقىلادى.
شانحاي مەرى الماتىنىڭ سەرىكتەستىكتى دامىتۋداعى ماڭىزدى توراپ ەكەنىن اتادى. ول بيىل شانحايدا وتكەن China International Import Expo حالىقارالىق كورمەسىنە الماتىلىق كاسىپورىنداردىڭ قاتىسۋىنىڭ ماڭىزدىلىعىنا توقتالدى. ونىڭ ايتۋىنشا، الماتى كومپانيالارىنىڭ ءونىم ۇسىنۋى ىنتىماقتاستىقتى تەرەڭدەتۋگە دەگەن قىزىعۋشىلىقتىڭ ارتا تۇسكەنىن كورسەتەدى.
گۋن چجەن سونىمەن قاتار ونەركاسىپتىك جانە يننوۆاسيالىق بايلانىستى دامىتۋ قاجەتتىلىگىنە سەنىم ءبىلدىرىپ، قالالار اراسىنداعى ەكونوميكالىق قاتىناستاردى كەڭەيتۋگە زور الەۋەت بار ەكەنىن ايتتى.
دارحان ساتىبالدى قازاقستان مەن جۇڭگو قارىم-قاتىناسى بۇرىن-سوڭدى بولماعان جاڭا، جوعارى دەڭگەيگە كوتەرىلگەنىن جەتكىزدى.
«ءبىز ەلدەرىمىزدىڭ كوشباسشىلارى اراسىنداعى تىعىز ساياسي ديالوگتى جوعارى باعالايمىز. مەملەكەت باسشىسى اتاپ وتكەندەي، قازاقستان مەن جۇڭگو اراسىنداعى قاتىناس دوستىق پەن ستراتەگيالىق سەرىكتەستىكتىڭ «التىن وتىز جىلدىعىنا» قادام باستى»، — دەدى الماتى اكىمى.
دارحان ساتىبالدىنىڭ ايتۋىنشا، شانحاي – الماتى ءۇشىن ستراتەگيالىق ارىپتەس قانا ەمەس، رۋحى جاقىن قالا. «الماتى مەن شانحاي كوپ جاعىنان ۇقساس: ەكەۋى دە ەلىنىڭ ەكونوميكالىق، يننوۆاسيالىق جانە تۋريستىك ورتالىعى»، — دەدى الماتى باسشىسى.
اكىم سونداي-اق 2025 جىلى جازدا الماتى مەن شانحايدىڭ رەسمي تۇردە باۋىرلاس قالالار مارتەبەسىنە يە بولعانىن ەسكە سالدى. بۇل شەشىم ساۋدا، ينۆەستيسيا، تۋريزم جانە ءبىلىم بەرۋ سالالارىنداعى سەرىكتەستىكتى كەڭەيتۋگە بەرىك نەگىز قالادى.
بۇگىندە الماتى – جۇڭگو بيزنەسى مەن تۋريستەرى ءۇشىن باستى تارتىلىس ورتالىعى. قالادا جۇڭگو كاپيتالى بار 5 مىڭنان استام كومپانيا جۇمىس ىستەيدى، بۇل قازاقستانداعى بارلىق جۇڭگو كاسىپورىندارىنىڭ شامامەن 70%-ى. 2025 جىلدىڭ العاشقى جارتىجىلدىعىندا الماتى مەن جۇڭگو اراسىنداعى تاۋار اينالىمى 7 ملرد اقش دوللارىنان اسىپ، 20% ءوستى.
تاراپتار سەرىكتەستىكتى ودان ءارى نىعايتۋعا دايىن ەكەنىن ءبىلدىردى. دارحان ساتىبالدى الماتى مەن شانحاي اراسىنداعى ىنتىماقتاستىقتىڭ ءۇش جىلدىق جوسپارىن ازىرلەۋدى، سونىمەن بىرگە ەكى قالانىڭ بيزنەسى اراسىندا تىكەلەي ديالوگ ورناتۋ جانە بىرلەسكەن جوبالاردى جۇزەگە اسىرۋ ءۇشىن الماتى-شانحاي ىسكەرلىك كەڭەسىن قۇرۋدى ۇسىندى.
ايتا كەتەيىك، بيىل ەكى قالا اراسىنداعى بايلانىستى نىعايتۋ اياسىندا China Eastern Airlines اۋە كومپانياسى الماتى – شانحاي تىكەلەي اۋە باعىتىن اشتى. سونىمەن بىرگە تۋريستەر لەگى دە ءوسىپ كەلەدى: جىل باسىنان بەرى الماتىعا كەلگەن قىتايلىق تۋريستەر سانى 33%-عا ارتتى.