قالاداعى كورمە 2 اپتاعا سوزىلادى
ابايدىڭ ءوزى ۇستاعان دومبىراسى، كىسە بەلبەۋى مەن قۇنانبايدىڭ مەككەگە كيگەن تاقياسى. وسىنداي قۇندى جادىگەرلەر بۇگىن ۇلى اقىننىڭ تۋعان جەرى سەمەيدەن اكەلىنىپ، الماتى مۋزەيىنە قويىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ەكسپوناتتاردى كوپشىلىك «اباي مۇراسى – حالىق قازىناسى» اتتى كوشپەلى كورمەدە تاماشالاي الادى. ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعى الماتىلىقتار ءۇشىن 50-دەن اسا تاريحي جادىگەر الىپ كەلىپتى.
اباي تۋعان، جەر كىندىگى – جيدەبايدان بۇگىن ارنايى الماتىعا جىلجىمالى كورمە كەلدى. شىعىستان العاش رەت ات ارىلتقان كورمەنى قالا اكىمدىگى مەن زيالى قاۋىم وكىلدەرى سالتاناتتى تۇردە اشىپ بەردى.
«جاستارعا كەرەك. ويتكەنى بۇل كىسىلەلەردىڭ ءسوزى، ويى، تەرەڭدىگى ءبىز ءۇشىن اۋاداي قاجەت. سوندىقتان مەن وتە بۇگىن باقىتتىمىن. وسىنشا ادام جيدەبايدىڭ رۋحاني سۋاتىنان ءدام تاتىپ جاتىر»، – دەدى جازۋشى، حالىقارالىق اباي كلۋبىنىڭ پرەزيدەنتى روللان سەيسەنبايەۆ.
سەمەيدەن اقىننىڭ ءوزى پايدالانعان زاتتارى مەن كىتاپتارى، قولجازبالارى، جالپى العاندا 52-گە تارتا جادىگەر اكەلىنىپتى.
ءۇش ىشەكتى دومبىرا مەن سىبىزعى ابايدىكى دەسەدى. بۇل قويىلعانى كوشىرمەسى ەكەن. تۇپنۇسقاسى سەمەيدە. ال مىناۋ اقىننىڭ كىسە بەلبەۋى. بۇل تەڭدەسسىز جادىگەرلەردى كەزىندە اباي ءوزىنىڭ دوسى نيكولاي دولگوپولوۆ ارقىلى 1885 جىلى سەمەيدەگى ولكەتانۋ مۋزەيىنە تاپسىرتقان ەكەن. كەيىننەن 1940 جىلى اباي مۋزەيى اشىلىپ، سول جاققا وتكىزىلىپتى.
بۇدان بولەك اباي مۋزەيىنەن اقىننىڭ ەكىنشى جارى ايكەرىمنىڭ قوبديشاسى دا جەتكەن. اعاش پەن اشەكەي تاستاردان جاسالعان تۇپنۇسقاداعى ساندىقشا اۋەلگى كۇيىن ءالى جوعالتپاپتى. ال اكەسى قۇنانبايدىڭ ناق وزىنەن ەكى جادىگەر قالعان دەسەك، سونىڭ ءبىرى – جەكە ءمورى، ەكىنشىسى – تاقياسى.
«سونىمەن قاتار ەڭ ءبىر قۇندى جادىگەرىمىز ابايدىڭ اكەسى قۇنانبايدىڭ مەككەگە بارعاندا كيگەن تاقياسى. بۇكىل حالىق سەمەيگە بارا بەرمەيدى عوي. سوندىقتان دا بۇل قالا تۇرعىندارىنا اباي ەلىمەن تانىسۋعا بولادى»، – دەدى ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىنىڭ» جەتەكشى عىلىمي قىزمەتكەرى نۇرجان بورانبايەۆ.
«ابايدىڭ مۋزەيى الماتى قالاسىنىڭ مۋزەيىنە العاش رەت كەلۋى. كورمە 2 اپتاعا سوزىلادى. بارلىق قالا تۇرعىندارى مەن قوناقتارىن وسى كورمەنى تاماشالاۋعا شاقىرامىز. كۇندەلىكتى تاڭعى 10.00-دەن 19.00-گە دەيىن ەسىگىمىز ايقارا اشىق»، – دەدى «الماتى قالاسى مۋزەيلەر بىرلەستىگى» كمقك ديرەكتورى ءلاززات ساعىندىقوۆا.
كوشپەلى كورمە بۇعان دەيىن نۇر-سۇلتان، ورال، قاراعاندى، پەتروپاۆل قالالارىندا ۇيىمداستىرىلىپتى. الداعى ۋاقىتتا وزگە دە وڭىرلەردە جالعاسپاق.