بۇل تۋرالى ق ر اۋىل شارۋاشىلىعى ۆيسە-مينيسترى ءابىلحايىر تامابەك ءمالىم ەتتى.
ءقازىر وسى باعىتتاعى جۇمىستار ءجۇرىپ جاتىر، دەپ حابارلايدى Almaty-akshamy.kz
«اۋىل شارۋاشىلىعىندا ونىمدىلىكتى ارتتىرۋ ءۇشىن ءار گەكتار جەردى ۇتىمدى پايدالانۋ قاجەت. 2019-2021 جىلدار ارالىعىندا اكىمدىكتەر جۇرگىزگەن جۇمىستاردىڭ اياسىندا 8،1 ملن گەكتار پايدالانىلمايتىن اۋىل شارۋاشىلىعى جەرى انىقتالدى. ولاردىڭ 3،4 ملن گەكتارىن جەر يەلەرى يگەرە باستادى، ال 2،1 ملن گەكتارى جەر مەملەكەت مەنشىگىنە قايتارىلدى، تاعى 2،6 ملن گەكتار جەردى مەملەكەتكە قايتارۋ بويىنشا جۇمىستار جۇرگىزىلۋدە»، - دەدى ءابىلحايىر تامابەك.
ۆيسە-مينيستردىڭ ايتۋىنشا، ءقازىر بارلىق وڭىرلەردەگى وزەكتى ماسەلەلەردىڭ ءبىرى - حالىقتى اۋىل شارۋاشىلىعى جەرىمەن قامتاماسىز ەتۋ. 2022 جىلعى 3 قاڭتاردا پايدالانىلمايتىن اۋىل شارۋاشىلىعى جەرلەرىن ماجبۇرلەپ الىپ قويۋ مەرزىمىن 2 جىلدان 1 جىلعا دەيىن قىسقارتۋ جانە مەملەكەتتىك باقىلاۋدىڭ جاڭا تەتىگىن ەنگىزۋ جونىندەگى نورما قابىلداندى.
«پايدالانىلماي جاتقان جەردىڭ 90%-ى شاعىن كاسىپكەرلىك سۋبەكتىلەرىنە تيەسىلى. بۇل رەتتە ميكرو جانە شاعىن كاسىپكەرلىك سۋبەكتىلەرىنە قاتىستى تەكسەرۋلەرگە موراتوريي ەنگىزىلگەنى بەلگىلى. سوندىقتان ولارعا تەكسەرۋلەر جۇرگىزە المايمىز»، – دەپ ءتۇسىندىردى ءابىلحايىر تامابەك.
الايدا سپيكەر 2022 جىلعى 4 مامىرداعى №139 بۇيرىققا سايكەس، «جاپپاي ءقاۋىپ» اياسىندا جالپى الاڭى 5،8 ملن گەكتاردى قۇرايتىن 1 901 شاعىن كاسىپكەرلىك سۋبەكتىسىنە قاتىستى جوسپاردان تىس تەكسەرۋ جۇرگىزىلىپ جاتقانىن دا ەسكەرتتى.
«جەر پايدالانۋشىلاردى ەكونوميكالىق ماجبۇرلەۋگە جاعداي جاساۋ ءۇشىن پايدالانىلمايتىن اۋىل شارۋاشىلىعى جەرلەرىنە سالىق ستاۆكاسى 10 ەسەدەن 20 ەسەگە ۇلعايتىلدى. وسىنى ەسكەرە وتىرىپ، بيىل 5 ملن گەكتار پايدالانىلمايتىن اۋىل شارۋاشىلىعى جەرىن مەملەكەتكە قايتارۋدى جوسپارلاپ وتىرمىز. بۇل رەتتە پايدالانىلمايتىن جانە زاڭنامانى بۇزىپ بەرىلگەن جەرلەردى الىپ قويۋ ءبىر كۇننىڭ جۇمىسى ەمەستىگىن اتاپ وتەمىن. ويتكەنى كونستيتۋسيانىڭ جانە ازاماتتىق كودەكستىڭ نورمالارىنا سايكەس مەنشىك قۇقىعى قورعالعان. ال مەملەكەتكە قايتارۋ پروسەسى تەك سوت ارقىلى جۇزەگە اسادى»، – دەپ تۇيىندەدى سپيكەر.