Elimizdegi eń tómengi eńbekaqynyń mólsheri 60 myń teńgeden 70 myń teńgege kóterilýine baılanysty Zeınetaqy jınaǵynyń eń tómengi jetkiliktilik shegi taǵy ósti.
Bul týraly Májilis depýtattarynyń saýalyna Ulttyq banktiń basqarma tóraǵasy Ǵalymjan Pirmatovtyń joldaǵan jaýabynda aıtylǵan, dep habarlaıdy Almaty-akshamy.kz Elorda.info saıtyna silteme jasap.
«Eń tómengi jetkiliktilik sheginiń negizgi mindeti – eńbekke qabiletsiz jastaǵy azamattardyń tynys-tirshiligi úshin zeınetaqy jınaqtarynyń eń tómengi qajetti deńgeıin qamtamasyz etý jáne Halyqaralyq eńbek uıymynyń usynystaryn eskere otyryp, olardyń eń tómengi qajettilikterin qanaǵattandyrý. Osyǵan baılanysty zeınetaqy júıesi azamattardyń zeınetaqy jınaqtarynyń kólemin tómengi jetkilikti shekten kem emes mólsherde jınaqtaýdy qamtamasyz etýi tıis. Ol shamany anyqtaý zeınetaqy jınaqtarynyń eń tómengi jetkilikti shegin aıqyndaý ádistemesine sáıkes júzege asyrylady», - dep jazdy Ǵ. Pirmatov.
Al eń tómengi jetkiliktilik shegin esepteý kezinde qoldanylatyn kórsetkishterdiń biri – azamattardyń ómir súrý deńgeıiniń eń tómengi standartyn qamtamasyz etýge arnalǵan eń tómengi jalaqy mólsheri.
«2022 jyly tómengi jetkilik sheginiń ósýine tómengi eńbekaqy mólsheriniń aıtarlyqtaı ósýi (42,5 myń teńgeden 60 myń teńgege deıin) áser etti. Sonymen qatar Memleket basshysynyń 2022 jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyna sáıkes 2023 jyldan bastap tómengi eńbekaqy mólsheri 60 000 teńgeden 70 000 teńgege deıin ulǵaıtylady. Bul 2023 jylǵa belgilengen tómengi jetkiliktilik sheginiń mólsherine de áser etti», - delingen Ulttyq bank basshysynyń jaýabynda.