Tarazda qoǵam belsendileri men blogerlerdiń atyn jamylǵan qylmystyq top quryqtaldy.
Uıymdasqan toptyń serkesi ózin belgili blogermin dep kásipkerlerden aqsha bopsalap kelgen. Sondaı-aq ol jambyldyq jastardy tárbıeleımin degen jeleýmen qaıyrymdylyq qoryn qurady. Qoǵamdyq qorǵa qarjy tartý úshin kásipkerlerdi jarna tóleýge mindettegen. Kónbegenderine kúsh kórsetip qorqytqan, dep habarlaıdy Almaty-akshamy.kz Qazaqstan.tv-ǵa silteme jasap.
Qylmys álemindegi toptardan qorǵaımyz dep qosymsha aqsha alyp otyrǵan. Al qylmysyn búrkemeleý úshin áleýmettik jelide ádilettilikti jaqtaýshy retinde belsendi bolyp kóringen. Uzaq ýaqyt Ulttyq qaýipsizdik komıtetiniń nazarynda bolǵan toptyń 9 múshesi ustaldy. Úı-jaılaryn tintý barysynda qańtar oqıǵasy kezinde qoldy bolǵan qarýlar tabyldy. Kalashnıkov avtomatynan bastap, qysqa uńǵyly myltyq pen birneshe tapansha tárkilengen. 38 dana pyshaq pen esirtki zattary da bar.
«Sonymen qatar qylmystyq toptan eki keliden astam esirtki tárkilendi. Qylmystyq topqa qatysýshylarǵa qatysty bopsalaý, qarý men esirtkini zańsyz saqtaǵany úshin 12 qylmystyq is qozǵaldy. Kúdiktiler ýaqytsha ustaý ızolátoryna qamaldy. Tergeý jalǵasýda», - deıdi QR İİM uıymdasqan qylmysqa qarsy kúres departamentiniń basqarma bastyǵy Qýandyq Alpys.