Kaspıı teńiziniń túbine úsh metr tereńdikke súńgý jumystaryn júrgizildi
16 mamyrda Aqtaýda Kaspıı teńizinde sýǵa batyp ketken úsh jigittiń máıiti tabyldy. Marqumdardyń biri bir kún buryn, 15 mamyrda úılengen eken. Bul týraly Mańǵystaý oblysy Tótenshe jaǵdaılar departamenti basshysynyń orynbasary Bekbolat Ábdiqadyrov aıtty, dep habarlaıdy Almaty-akshamy.kz.
Lada.kz saıtynyń málimetinshe, qaıtys bolǵan eki qaraǵandylyq Aqtaýǵa dosynyń toıyna kelgen. 16 mamyrda dostar teńizge shomylýǵa sheshim qabyldaǵan. Osylaı úsheýi de sýǵa batyp ketken.
«Sýǵa túsýge sheshim qabyldaǵan eki jigit sýǵa bata bastaǵan, al ekeýi olardy qutqarýǵa umtylǵan. Dostaryn qutqarý úshin sekirip ketkenderdiń birin oqıǵa kýágerleri alyp shyqty. Ol 26 jastaǵy Beıneý qalasynyń turǵyny. Qazir jaǵdaıy qanaǵattanarlyq, dárigerlerdiń qaraýynan keıin úıine shyǵaryldy», - dedi Bekbolat Ábdiqadyrov.
Oqıǵa ornynda izdestirý jumystaryn júrgizý barysynda TJD kúshteri jaǵalaýdan 1,5-2 metr qashyqtyqta Kaspıı teńiziniń túbine úsh metr tereńdikke súńgý jumystaryn júrgizdi. Sondaı-aq, oqıǵa ornynda Tótenshe jaǵdaılar departamentiniń psıhologıalyq qyzmetiniń toby jumys istep, sýǵa batqan jastardyń jaqyndaryna kómek kórsetti.
«Aýa raıynyń qolaısyzdyǵyna qaramastan, qutqarýshylar kásibı jáne tıimdi jumys istedi, az ýaqyt ishinde sýǵa batqan úsh adamnyń da denesi tabylyp, sýdan shyǵaryldy», - dedi Bekbolat Ábdiqadyrov.
Oqıǵa ornynan alkogóldik sýsyndar tabylǵan.
Eske salaıyq, Kaspıı teńizinde shomylý kezinde tórt jigit sýǵa batyp ketken. Olardyń birin oqıǵa kýágeri aman alyp qaldy, qalǵan úsheýi qutqarýshylar kelgenshe sýǵa batyp ketti.