Búgin tún ortasynda Jeti qaraqshy juldyzynyń shómish saby joǵary qarap, ońtústik jaqty kórsetedi. Bul kún men tún teńelgenin, Kóktemniń kirgenin, topyraq juldyzynyń baǵy janǵanyn bildiredi
Naýryzdyń 15-i kúni túnde aspanda «aýys-túıis» oryn aldy. İri-iri «qys» juldyzynyń ornyn jypyrlaǵan «jaz» juldyzy basty... Úkimette de, Parlamentte de naq osy kúni ózgeris oryn aldy. Bári jańaryp jatyr: jer de, el de. Jańa Qazaqstanymyz ben jańa qoǵamymyzdyń jańa da jarqyn qadamy nyq senimmen bastaldy.
Naýryz - kóktemniń ǵana emes, jyldyń da basy. Jańa jyl. Tabıǵat amaldary naýryz aıynan bastalady. Kóktem kelisimen, tabıǵatta jaýyndy kúnder kóbeıedi. Osy aıdyń 15-inen bastap aspan juldyzdary arasynda «aýys-túıis» oryn aldy. Munyń mánisi: «qysqy» badanadaı-badanadaı iri juldyzdardyń orynyn «jazǵy» jypyrlaǵan usaq juldyzdar basady. Qazan aıynyń 15-ine deıin juldyzdar usaqtaý kórinedi. Al qazannyń 15-inen bastap kók júzinde qaıtadan úlken juldyzdar qaptaıdy.
Qaýipti amal «Ábdikeı» búgin bitedi. Basqasha atalýy – sıyrdyń «oraza ustaýy». Bulaı atalý sebebi: muz astyndaǵy sýdan qanyp ishe almaǵan sıyrlar erigen qar sýyna qanyp, qardan shyqqan kóldeneń shópke toıyp, arqasyn kúnge tosyp, birneshe saǵat jaıylmaı turatyn bolǵan. Osy kórinisti sıyrdyń «oraza ustaýy» dep ataǵan. Kónekóz qarıalar sıyrdyń «oraza ustaý» ýaqytyna qarap, qys aıaǵyn boljaıtyn bolǵan: qalyń qardyń sheti sógilip, erip, sý aǵady. Qardan aqqan sýǵa torǵaı shomylatyndaı bolsa, jaz erte shyǵady dep, qardan aqqan sý mardymsyz bolsa, jaz jáı shyǵady dep esepteıdi.
«Qardyń basyn qar alar...» degen maqaly bar «Qusqanaty» amaly naýryzdyń 26–28-ine dóp keledi. Ol kúnderi japalaqtap qar jaýyp, ile erip, ne jańbyr sirkireıtin bolǵan. Jerkóktiń bárin sý basqan alasapyran shaq osy kez. Almatyda aptaǵa sozylǵan Naýryz merekesi keremet bolyp erekshe jaǵdaıda ótti. Tájindettiń kesirinen toılanbaı qalǵan jyldardyń esesi qaıtqandaı boldy. Merekeniń alǵashqy kúnderi aspandy qara bult búrkegenimen qar jaýmady, kún aıtarlyqtaı salqyndaǵan da joq. Biraq Naýryz meıramynyń sońǵy kúni (23.03.22.) maıdalap jaýǵan qar Almatyǵa aq qardan shapan japty. Sınoptıkter bir aıdyń qary bir kúnde jaýdy dep dabyl qaqty. 2015 jyly naýryzdyń 29-30 aralyǵynda Almatyda qalyń qar jaýǵan bolatyn. Aýa raıyn zertteıtin ortalyqtyń mamandary muny Almatyda sońǵy 3 jylda jaýǵan eń qalyń qar dep ataǵan edi. Qalyńdyǵy 35 santımetrge jetken. Bul - bir jylda jaýatyn qardyń úshten bir bóligi eken. Esesine, 2016 jylǵy jaz aılary óte ystyq bolǵanyn almatylyqtar áli umytpaǵan bolar.
Naýryz aıy da aıaqtalýǵa taıap qaldy. Búgin qoldanystaǵy kúntizbe boıynsha, naýryzdyń 25-i. Al aı esebi boıynsha, 22-si. Qazaqy qısynǵa súıensek, aıdyń 8-shi kúni. Apta aıdyń basyn da, ortasyn da, sońyn da qamtyp tur. Bulardyń aýa raıyna áseri bolmaı qalmaıdy. Kúndiz kúnniń kózi jarqyryp turǵanymen, túnge qaraı sýytýy múmkin. Sonyń saldarynan kúndiz erigen qar túngi jáne tańǵy aıazben qatyp, muzǵa aınalyp, kóktaıǵaq oryn alýy ǵajap emes... Óıtkeni, bul «Qusqanaty» amaly ǵoı. Qustar kelip jatyr mekenine. Qustardyń qanatymen jel keledi, samal esedi, olarǵa jańbyr men qar ilesedi...