70 mlrd teńge kóleminde qosymsha búdjettik nesıe bólý tapsyryldy.
Qazaqstan Úkimeti janyndaǵy daǵdarysqa qarsy sharalar jónindegi jedel shtabtyń kezekti otyrysynda egin egýdi qosymsha qarjylandyrý jáne aýyl sharýashylyǵy óndirisi úshin taýarlardy jetkizý logıstıkasy máseleleri talqylandy, dep habarlaıdy Almaty-akshamy.kz Eldala.kz cilteme jasap.
Aǵymdaǵy syrtqy saıası jaǵdaı tehnıka, tuqym, genetıkalyq materıal, mıneraldy tyńaıtqyshtar jáne basqalardy qosa alǵanda, aýyl sharýashylyǵy taýarlaryna álemdik, onyń ishinde qazaqstandyq baǵalardyń ósýine túrtki bolatyny atap ótildi. Bul týraly Premer-Mınıstrdiń baspasóz qyzmeti habarlady.
Kepilmen baılanysty máselelerdi sheshý úshin fermerlerde qajetti ótimdi kepildikteri bar astyq jáne maı naryǵynyń treıderleri arqyly agrarshylarǵa nesıe berý múmkindigin qarastyrý usynyldy.
Buǵan deıin Aýyl sharýashylyǵy mınıstrligine Qarjy jáne ulttyq ekonomıka mınıstrlikterimen, «Báıterek» UBH-men birlesip, respýblıkalyq búdjetti naqtylaý aıasynda kóktemgi egis jáne egin jınaý jumystaryn júrgizýge 70 mlrd teńge kóleminde qosymsha búdjettik nesıe bólý tapsyryldy.
Sonymen qatar, mıneraldy tyńaıtqyshtar baǵasyn tómendetý boıynsha jumystar júrgizilýde. 16 naýryzdan bastap amıak selıtrasynyń quny tonnasyna 200 myń teńgeden 160 myń teńgege deıin tómendedi.
Azyq-túlik qaýipsizdigin arttyrý týraly aıta kele, ASHM basshysy ımporttyq táýeldilikti tómendetý úshin menshikti tuqym suryptaryn ázirleý baǵdarlamasy týraly habarlady. Atap aıtqanda, Aýyl sharýashylyǵy mınıstrligi otandyq tuqymdardy ósirý boıynsha jol kartasyn ázirledi.
«Qysqa merzimde otandyq tuqym suryptarynyń ǵylymyn damytý boıynsha orta merzimdi baǵdarlama qabyldaý qajet. Tuqymnyń qazirgi suryptary nasharlap, ónimdilik tómendeýde. Jyldan-jylǵa qurǵaqshylyqtyń kúsheıýine turaqty úrdis baıqalady. Bul oraıda qurǵaqshylyqqa tózimdi jáne ónimniń úlken kólemin beretin tuqymdardyń jańa suryptaryn ázirleý asa mańyzdy», - dep atap ótti Premer-Mınıstr Álıhan Smaıylov.
Sondaı-aq, Úkimet QR Indýstrıa jáne ınfraqurylymdyq damý mınıstrligine «Qazaqstan temir joly» AQ-men birlesip, aýyl sharýashylyǵy óndirisi úshin taýarlyq-materıaldyq qundylyqtardy ýaqtyly jetkizý úshin qosymsha jyljymaly quramdy qamtamasyz etýdi, sondaı-aq Reseıden tuqym ımporty boıynsha jetkizýdiń balama baǵyttaryn pysyqtaýdy tapsyrdy.