Aglomerasıany damytýdyń keshendi josparyn ázirleýge qatysady.
Búgin Senattyń jalpy otyrysynda «Aglomerasıalardy damytý týraly» Zańy men ilespe qujat qabyldandy, dep habarlaıdy Almaty-akshamy.kz QazAqparatqa silteme jasap.
«İri qalalarda halyq sany men jer aýmaǵynyń ósýi turǵysynda birqatar problema baıqalyp otyr. Osy oraıda ınfraqurylymnyń barlyq túrlerine júktemeniń artýy, qalanyń shet aımaqtarynda retsiz qurylys salynýy, egjeı-tegjeıli josparlaý jobalarynyń durys iske aspaýy, yńǵaıly kólik júıesiniń bolmaýy, sondaı-aq ınfraqurylymdyq, áleýmettik, ónerkásiptik jáne taǵy basqa nysandardyń tapshylyǵy sıaqty taǵy basqa da problemalar bar. Aýmaqtardyń tıisti deńgeıde úılestirilmeı damýynyń negizgi sebepteriniń biri – aglomerasıalardyń damýyn retteıtin normatıvtik quqyqtyq bazanyń bolmaýy. Osy oraıda, ortalyq qala men onyń mańyndaǵy aımaq arasyndaǵy fýnksıalardy zańnamalyq turǵydan bólý qajet», - dedi Ulttyq ekonomıka mınıstri Álibek Qýantyrov.
Onyń aıtýynsha, osy salany retteıtin zań jobalaryn ázirleý úshin Memleket basshysynyń birqatar tapsyrmasy negiz boldy. Prezıdent 2021 jylǵy Qazaqstan halqyna Joldaýynda «Aglomerasıalardy damytý týraly» Zańdy ázirleýdi tapsyrdy. Bul turǵyda úzdik halyqaralyq tájirıbeni qoldana otyryp, mınıstrlik tıisti zań jobalaryn ázirledi.
«Negizgi zań jobasy aıasynda «aglomerasıa» termıniniń anyqtamasy jáne aglomerasıalardy anyqtaıtyn tıisti krıterııler engiziledi. Aglomerasıa quramyn ýákiletti organ, ıaǵnı Ulttyq ekonomıka mınıstrligi qalyptastyratyn bolady jáne ol Úkimettiń qaýlysymen bekitiledi. Sonymen birge, eldi mekenderdi aglomerasıalardyń quramyna engizý jáne olardyń tizbesin júrgizý qaǵıdalary mınıstrliktiń buıryǵymen bekitiletin bolady. Osy oraıda, aglomerasıalardy aıqyndaýdyń negizgi krıterııleri retinde mynalar tanylady: ortalyq qalanyń ákimshilik mártebesi, demografıalyq syıymdylyq, logıstıkalyq áleýet, ekonomıkalyq áleýet. Zań jobasy qabyldanǵannan keıin, osy ólshemsharttarǵa sáıkes, «aglomerasıalar» retinde Almaty, Astana, Shymkent, sondaı-aq basqa da oblys ortalyqtary aıqyndalady», - dedi vedomstvo basshysy.
Negizgi jáne ilespe zań jobalary aıasynda óńirlerdiń ákimdikterine 25 qosymsha ókilettik berilmek. Negizgi zań jobasy boıynsha 11 ókilettik, al ilespe zań jobasy turǵysynda 14 ókilettik eskerilgen.
«Negizgi zań jobasyna sáıkes ortalyq qala men irgeles oblystardyń ákimdikteri aglomerasıa aýmaǵyndaǵy jergilikti mańyzy bar máselelerdi birlesip sheshýge, tıisti kelisimdi daıyndaýǵa jáne oǵan qol qoıýǵa qatysatyn bolady. Sondaı-aq ákimdikter Jergilikti aglomerasıa keńesin qurýǵa jáne onyń qyzmetine, aglomerasıany damytýdyń keshendi josparyn ázirleýge qatysady. Budan basqa, ortalyq qalalardyń jergilikti atqarýshy organdary qala mańy aımaǵyn damytýdyń Bas josparyn iske asyrý boıynsha sýbektilerdiń qyzmetin úılestiredi, Bas jospardyń jobasyn ázirleýdi uıymdastyrady, sondaı-aq sáýlet, qala qurylysy jáne qurylys qyzmeti salasyndaǵy memlekettik normatıvterdiń jobalaryna kelisim beredi», - dep naqtylady mınıstr.
Budan buryn habarlanǵandaı, keıingi 10 jyl ishinde Astana qalasynyń halqy 59 paıyzǵa, Almaty qalasynyń halqy 37 paıyzǵa, Shymkent qalasynyń halqy 67 paıyzǵa ósti. Astana elorda bolǵaly jer aýmaǵy jaǵynan 3 ese keńeıdi, Almaty qalasynyń aýmaǵy keıingi on jylda 2,5 ese, al Shymkenttiń aýmaǵy 3,5 ese ósti.