«Qaırat» fýtzal klýby Qazaqstan chempıonaty men ÝEFA Chempıondar lıgasyndaǵy maýsymdy senimdi túrde jalǵastyryp kele jatyr.
Komanda Eýropanyń basty týrnıriniń shırek fınalyna joldama alyp, 23 aqpanda Almatydaǵy Balýan Sholaq atyndaǵy Sport saraıynda ıspanıalyq «Kartahena» klýbyna qarsy alǵashqy machty ótkizedi, - dep habarlaıdy Aqshamnews.kz.
Qarymta kezdesý 6 naýryzda Ispanıada ótedi, eki oıynnyń qorytyndysy boıynsha jeńiske jetken komanda ÝEFA Chempıondar lıgasynyń Tórttik fınalyna shyǵady. «Qaırat» FK sport dırektory Gýstavo Paradeda men komanda kapıtany Birjan Orazov maýsymdaǵy jetistikter, alǵa qoıylǵan maqsat pen klýbtyń damýy týraly Óńirlik komýnıkasıalar qyzmetinde baıandap berdi.
ÝEFA Chempıondar lıgasynyń osy maýsymy fýtzal úshin erekshe boldy: jarys alǵash ret úıde jáne syrt alańda ótetin machtar formatynda uıymdastyrylyp otyr. Bul jarysty tartysqa toly etip, kórermenniń delebesin qozdyrdy. Aıta keteıik, ótken maýsymda almatylyq klýb Chempıondar lıgasynyń fınalyna deıin jetip, kúmis júldeni ıelengen.
«Aqpan aıynda biz ÝEFA kýbogy úshin oınaımyz. Biz bul kýbokty eki ret jeńip alǵanbyz. Bul eń joǵary deńgeıdegi jarys. Sonymen qatar, bıyl bizdiń klýbtyń qurylǵanyna 30 jyl tolyp otyr, sondyqtan osy jyly úshinshi ÝEFA kýbogyn alýdy qatty qalap otyrǵan jaıymyz bar. Árıne, qarsylasymyz da óte myqty Ispanıanyń «Kartahena» komandasy, olar ózderinde absolútti chempıon. Bizdi óte tartysty oıyn kútip tur. Alǵashqy machty óz alańymyzda, Almatyda ótkizemiz. 23 aqpanda jankúıerlerimizdiń qoldaýyn asyǵa kútemiz, barshańyzdy Balýan Sholaq atyndaǵy Sport saraıyna shaqyramyz. Sizder qoldasańyzdar jeńiske jetý jeńildeý bolady», – dedi «Qaırat» jankúıerlerine úndeý tastaǵan Gýstavo Paradeda.
Klýbtyń sport dırektory Gýstavo Paradeda jankúıerlerge basshy retinde ǵana emes, burynǵy «Qaırat» oıynshysy retinde de jaqsy tanys. Ol 2005–2010 jyldary komanda sapynda óner kórsetip, Qazaqstannyń bes dúrkin chempıony atanyp, klýb tarıhyndaǵy alǵashqy eýrokýboktyq júldelerdi jeńip alýǵa úles qosty. Ótken maýsymda ol el chempıonatynyń sheshýshi kezeńinde komandany ýaqytsha basqaryp, «Qaıratty» taǵy chempıon qyldy.
1995 jyly Almaty qalasynda qurylǵan «Qaırat» fýtzal klýby osy ýaqyt ishinde Qazaqstandaǵy eń ataqty klýbqa aınaldy. Komanda ÝEFA Chempıondar lıgasynyń eki dúrkin jeńimpazy (2013 jáne 2015 jyldar), el chempıonatynyń 21 dúrkin chempıony, sonyń ishinde qatarynan 20 chempıondyq ataqqa qol jetkizgen biregeı serıanyń ıegeri, sondaı-aq Qazaqstan Kýbogy men Sýperkýbogynyń birneshe dúrkin jeńimpazy boldy. «Qaırat fýtzal» ÝEFA Chempıondar lıgasynyń júldegerleri qatarynan jıi kórinip, Qazaqstandy únemi halyqaralyq arenada tanystyryp júr.
«Qaırat» Qazaqstannyń ulttyq, jastar jáne jasóspirimder quramasyna oıynshy daıarlaıtyn negizgi klýbtyń biri. Qazir klýbtyń balalar akademıasynda 7 men 19 jas aralyǵyndaǵy 300 bala jattyǵady. Akademıa Almaty ákimdiginiń qoldaýymen jumys istep, buqaralyq sporttyń damýyna eleýli úles qosyp júr. 2025 jyly klýb qurylymynda akademıa men kásibı fýtzal arasyndaǵy mańyzdy býynǵa aınalǵan U-21 komandasy quryldy.
Klýbta jattyǵý men qalypqa keltirý zaldary, trenajer zaly, medısınalyq jáne fızıoterapıalyq bólimder, sondaı-aq jazǵy jattyǵý alańdary, jaǵajaı men ashyq oıyn alańdary bar. Bul barlyq jastaǵy komandalarǵa joǵary kásibı deńgeıde daıyndalyp, qalpyna kelýge múmkindik beredi.
«Men sport dırektory bolyp otyrǵan Akademıada 300-den astam bala jattyǵady. Akademıamyzdy qoldap otyrǵan Almaty qalasynyń ákimdigine úlken alǵys bildiremin. Osy jerden kásibı deńgeıde oınaıtyn tamasha oıynshylar ósip shyǵyp jatyr. Olar bizdiń juldyzdarymyz, biz olardyń jetistigin maqtan tutamyz. Daryndy balalardy tárbıeleý úshin klýbta qazir barlyq jaǵdaı jasalǵan», – dep atap ótti Gýstavo Paradeda.
2024/2025 maýsymynda «Qaırat fýtzal» taǵy bir mańyzdy qadam jasap, áıelder komandasyn qurdy. Qazaqstan chempıonatyndaǵy debúttik maýsymynda áıelder komandasy birden el chempıony atandy, onyń segiz oıynshysy qazir eldiń fýtzaldan ulttyq quramasynyń namysyn qorǵaıdy.
«Qaırat fýtzal» – jeńis pen trofeı ǵana emes, sonymen qatar fýtzaldyń júıeli damýy, jas oıynshylardy daıarlaý men Qazaqstannyń halyqaralyq sport arenasyndaǵy bedelin nyǵaıtý jolyndaǵy keshendi jumys.