Almaty qalasynyń polısıa qyzmetkerleri jedel-izdestirý is-sharalary barysynda qala aýmaǵynda sıntetıkalyq esirtki zattaryn taratýmen aınalysqan bir top adamnyń zańsyz áreketin áshkereledi, - dep habarlaıdy aqshamnews.kz.
Kúdiktilerdi qolǵa túsirý keshki ýaqytta júzege asyryldy. Tintý kezinde olardan ári qaraı baılanyssyz tásilmen, ıaǵnı jasyryn qoıyp ketý arqyly ótkizýge daıyndalǵan untaq tárizdi zat salynǵan 19 orama tárkilendi.
Sot-saraptamasynyń qorytyndysyna sáıkes, tárkilengen zat azamattardyń ómiri men densaýlyǵyna asa qaýipti sanalatyn sıntetıkalyq esirtki — álfa-PVP ekeni anyqtaldy. Tergeý barysynda ustalǵan tulǵalardyń ınternet arqyly jumys isteıtin esirtki dúkeniniń nusqaýy boıynsha áreket etip, taratýshy rólin atqarǵany belgili boldy. Árbir jasyryp qaldyrylǵan orama úshin tólem sıfrlyq platformalar men elektrondy ámıandar arqyly júrgizilgen. Bul — esirtki bıznesin uıymdastyrýshylar óz izin jasyrý úshin jıi qoldanatyn sqema. Búginde esirtki bıznesi "jeńil tabys" retinde búrkemelenip usynylýda.
— Jastardy ınternet arqyly tez aqsha men tolyq jasyryndyq ýáde etip, zańsyz áreketke tartady. Alaıda munyń sońy árdaıym bir — qamaýǵa alý, qylmystyq jaýapkershilik jáne taǵdyrdyń talqandalýy. Polısıa mundaı arnalardy adam qylmystyq sqemaǵa qansha ýaqyt qatysqanyna qaramastan — birneshe aı bolsyn, birneshe kún bolsyn — júıeli túrde anyqtap, jolyn kesedi, — dedi Almaty qalasy polısıa departamenti esirtki qylmysyna qarsy is-qımyl basqarmasynyń bastyǵy Murat Jumabaev.
Polısıa ókilderi esirtkiniń zańsyz aınalymyna, tipti kýrer nemese jasyryn qoıyp ketýshi rólinde bolsa da, qatysý aýyr qylmys sanalatynyn jáne qatań jaýapkershilikke ákeletinin eskertedi. Esirtki zattaryn ınternet arqyly taratý arnalarynyń jolyn kesý jumystary "Zań men tártip" qaǵıdaty aıasynda jáne esirtki qylmysynyń aldyn alý basymdyqtary boıynsha jalǵasýda.