Júk tasý aınalymy 252 mıllıard tonna-shaqyrymǵa deıin artty.
Memleket basshysyna ulttyq kompanıanyń byltyr atqarǵan jumystarynyń negizgi nátıjesi, temirjol salasyn damytýdyń aldaǵy kezeńge arnalǵan jospary, sondaı-aq berilgen tapsyrmalardyń oryndalý barysy jóninde málimet berildi, dep habarlaıdy Almaty-akshamy.kz.
Nurlan Saýranbaevtyń aıtýynsha, «Qazaqstan temir joly» UQ» aksıonerlik qoǵamynyń júk tasý aınalymy 252 mıllıard tonna-shaqyrymǵa deıin artty. Bul – elimizdiń táýelsizdik jyldaryndaǵy eń joǵary kórsetkishi. JPE-men (jıyrma puttyq ekvıvalentpen) eseptegende, jalpy konteınermen tasymaldaý kólemi 1,129 myńǵa deıin ósti.
Sonymen qatar Qasym-Jomart Toqaevqa ınfraqurylymdyq jobalardyń iske asyrylýy jóninde baıandaldy. Úsh jylda barlyǵy 1285 shaqyrym jol salý josparlanyp otyr. Bul júk tasymalynyń kólemin ulǵaıtyp, elimizdiń eksporttyq áleýetin arttyrýǵa múmkindik beredi. Temirjol qurylysynda paıdalanylatyn qazaqstandyq ónimder men qyzmetterdiń úlesi – 85 paıyz.
Budan bólek, «Qazaqstan temir joly» basshysy Prezıdentke halyqaralyq kólik dálizderin damytý jáne Aqtaý, Quryq teńiz porttarynyń ótkizý qabiletin keńeıtý jumystarynyń barysy, sondaı-aq halyqaralyq iri kólik-logıstıkalyq kompanıalarmen yntymaqtastyq máseleleri jóninde aıtty.
Kezdesý sońynda Memleket basshysy temirjol ınfraqurylymyn damytýǵa jáne jańǵyrtýǵa qatysty birqatar naqty tapsyrma berdi.