Jospar Joldaýdyń negizgi baǵyttary men bastamalary boıynsha 102 tarmaqtan turady.
Qazaqstan Úkimeti óz otyrysynda Prezıdent Qasym-Jomart Toqaevtyń Joldaýyn iske asyrý Jalpyulttyq jospary qabyldandy, dep habarlaıdy Almaty-akshamy.kz Primeminister.kz silteme jasap.
QR Premer-Mınıstri Asqar Mamınniń tóraǵalyǵymen ótken Úkimet otyrysynda QR Prezıdenti Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» Joldaýyn iske asyrý jónindegi Jalpyulttyq is-sharalar jospary qaraldy.
Ulttyq ekonomıka mınıstri Áset Erǵalıev usynǵan Jalpyulttyq jospar QR Prezıdentiniń negizgi baǵyttary men bastamalary boıynsha 102 tarmaqtan turady.
Premer-Mınıstr Memleket basshysy Qasym-Jomart Toqaev Qazaqstan halqyna arnaǵan Joldaýynda júrgizilip jatqan memlekettik jáne ekonomıkalyq saıasattyń jańa mindetterin atap kórsetkenin aıtty.
Úkimet pandemıadan keıingi kezeńde ekonomıkanyń ornyqty ári sapaly ósýin qamtamasyz etý, densaýlyq saqtaý, bilim berý, mádenıet salalaryn jetildirý, óńirlerdi keshendi damytý, eńbek naryǵynyń tıimdi ekojúıesin qurý boıynsha belsendi sharalar qabyldaıdy.
«Úkimet jumysynyń mańyzdy baǵyty – Memleket basshysynyń azamattardyń áleýmettik ál-aýqatyn arttyrý jónindegi bastamalaryn iske asyrý. Jalaqyny kóterý, jeke sektordyń úlesin ulǵaıtý, salyqtyq júktemeni azaıtý arqyly halyqtyń naqty kiristeriniń ósýin qamtamasyz etýge erekshe nazar aýdarylatyn bolady»,– dedi Asqar Mamın.
Úkimet basshysy Memleket basshysynyń Joldaýyn iske asyrý jónindegi Jalpyulttyq is-sharalar jospary alǵa qoıylǵan mindetterge tolyqtaı saı ekenin atap ótti.
Asqar Mamın ortalyq jáne jergilikti atqarýshy organdardyń birinshi basshylaryna jospar is-sharalarynyń sapaly ári ýaqytyly oryndalýyn qamtamasyz etý boıynsha derbes jaýapkershilik júkteletinin atap ótti.
