Qazaqstan men Shveısarıa arasyndaǵy ekijaqty qarym-qatynastar jandanýda
SİM málimetinshe, Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Shveısarıa Konfederasıasyna resmı saparmen bardy, dep habarlaıdy Almaty-akshamy.kz
Qazaqstan men Shveısarıa ekijaqty qarym-qatynastardyń barlyq spektri boıynsha ózara tıimdi, kóp josparly yntymaqtastyqty damytýǵa nıetti. Qazaqstan SİM basshysy M.Tileýberdi Shveısarıa Vıse-prezıdenti, Federaldyq keńesshisi (mınıstri) Ignasıo Kassıspen kelissózderiniń negizgi leıtmotıvi osyndaı.
«Shveısarıa - Qazaqstannyń Eýropadaǵy mańyzdy saıası jáne ekonomıkalyq áriptesteriniń biri. Biz senimge, ózara qurmetke jáne ortaq basymdyqtarǵa negizdelgen berik qatynastar ornattyq. Bul qatynastar jahandyq jáne óńirlik qaýipsizdikti qamtamasyz etýdegi senimdi seriktestikpen, serpindi saýda yntymaqtastyqpen, sondaı-aq saıası jáne tulǵaaralyq qatynastarmen nyǵaıtylýda», - dedi M.Tileýberdi.
Qazaqstan men Shveısarıanyń joǵary basshylyǵy arasyndaǵy baılanystardyń qarqyndy damýyn jáne eki jaqty ózara is-qımyldy nyǵaıtýǵa ózara múddeliliktiń artyp kele jatqanyn atap ótip, taraptar úkimetaralyq, parlamentaralyq jáne iskerlik baılanystardy damytýǵa odan ári járdemdesýge kelisti. Bul turǵyda Qazaqstan Respýblıkasynyń Prezıdenti Qasym-Jomart Toqaevtyń aǵymdaǵy jyldyń qarashasyna josparlanǵan Shveısarıaǵa resmı saparyna daıyndyq barysyna erekshe nazar aýdaryldy.
Halyqaralyq máseleler boıynsha pikir almasý barysynda taraptar BUU, EQYU jáne basqa da kóp jaqty qurylymdar aıasyndaǵy ózara is-qımyldy talqylady. Kelissózderdiń kún tártibine óńirlik máseleler, sonyń ishinde Aýǵanstandaǵy jaǵdaı, Ortalyq Azıa elderimen yntymaqtastyq jáne sý resýrstaryn basqarý kirdi. Damýǵa resmı kómek jelisi boıynsha, atap aıtqanda qazaqstandyq KazAID Halyqaralyq damý agenttigi jáne Shveısarıanyń SDC Damý jáne yntymaqtastyq agenttigi arasyndaǵy birlesken jumys aspektileri qozǵaldy.
Kelissózder qorytyndysy boıynsha delegasıa basshylary dıplomatıalyq nemese qyzmettik pasporttardyń ıelerin vızalyq talaptardan ózara bosatý týraly, sondaı-aq dıplomatıalyq ókildikter, halyqaralyq uıymdar janyndaǵy turaqty ókildikter men konsýldyq mekemeler qyzmetkerleriniń otbasy músheleriniń aqyly eńbek qyzmeti týraly eki úkimetaralyq kelisimge qol qoıdy.
Syrtqy saıası kún tártibindegi ekonomıkalyq dıplomatıanyń basymdyǵyn eskere otyryp, Mınıstr M.Tileýberdi sol kúni Shveısarıanyń «Stadler Rail», «Ammann Group», «Sandoz», «KS Genetics», «Inoks Capital» jáne «Philip Morris International» iri kompanıalarynyń basshylarymen kezdesýler ótkizdi.
Qazaqstandaǵy ınvestısıalyq ahýaldy jaqsartý boıynsha qabyldanyp jatqan sharalardy usyna otyryp, mınıstr shveısarıalyq áriptesterdi ınvestısıalardy tartýdy yntalandyrýdyń jańa quraly «Strategıalyq ınvestısıalyq kelisimmen» tanystyrdy.
Saýda-ekonomıkalyq yntymaqtastyqty damytýdyń úlken áleýeti Shveısarıa bıznesiniń hımıa-farmasevtıka jáne mashına jasaý, jańa tehnologıalar men energetıka salasynda, agroónerkásip kesheni (AÓK) men qarjy sektorynda ózara tıimdi jobalardy iske asyrýǵa múddeliligimen rastalady. Shveısarıanyń Qazaqstannyń iri syrtqy ekonomıkalyq seriktesteriniń biri retindegi róli men mańyzy atap ótildi. 2020 jyly Shveısarıa Qazaqstanǵa tartylǵan tikeleı sheteldik ınvestısıalar kólemi boıynsha 3-shi oryndy, al bizdiń elmen ekijaqty saýda kólemi boıynsha 10-shy oryndy ıelendi.
Sapar aıasynda «Kazakh Invest» UK» AQ men shveısarıalyq kompanıalar arasynda Qazaqstannyń AÓK jáne mashına jasaý salasyndaǵy ınvestısıalyq jobalardy iske asyrý boıynsha yntymaqtastyq týraly memorandýmdarǵa qol qoıyldy.
Syrtqy ister mınıstri bastaǵan qazaqstandyq delegasıa Bern tarıhı murajaıynda Qazaq memlekettiliginiń tarıhynan biregeı muraǵattyq materıaldarǵa arnalǵan arnaıy kórmeni aralady. Mýzeıde sondaı-aq R.B. Súleımenov atyndaǵy Shyǵystaný ınstıtýty, Bern tarıhı mýzeıinde jáne Bern ýnıversıteti arasynda «Ortalyq Azıa men Shveısarıanyń túrki halyqtarynyń murasy» atty kelisimge qol qoıý rásimi ótti.