"Alataý Aqparat" medıaholdıngi qalta kitapshalaryn shyǵaryp jatqanyna qýanyshtymyn»
«Alataý Aqparat» medıaholdıngi Qazaqstan baspasóziniń tarıhynda birinshi ret qaltaǵa sıatyn kitaptar serıasymen óziniń jeke kitaphanasyn shyǵara bastady. Alǵashqy bolyp Qazaqstan Jýrnalıser akademıasynyń prezıdenti Saǵymbaı Qozybaevtyń «Daıdıdaý» atty shaǵyn kitapshasy jaryq kórdi.
Qazaqstan baspasóziniń bir jarym ǵasyrlyq tarıhynda tuńǵysh ret «Alataý Aqparat» medıaholdıngi Pocketbook formatyndaǵy, ıaǵnı qaltaǵa sıatyn shaǵyn kitapshalardyń jeke kitaphanasyn shyǵara bastady. Mundaı kitapshalar tek Keńes Odaǵy kezinde «Ogonek» jýrnalynda basylyp shyqqan.
Medıaholdıng óz kitaphanasynda belgili qazaqstandyq ádebıetshilerdiń, jazýshylardyń, pýblısıserdiń týyndylaryn basyp shyǵarýdy kózdep otyr. Qalta kitapshalarynyń toptamasyn Qazaqstan Jýrnalıser akademıasynyń negizin qalaýshy ári prezıdenti, QazUÝ baspasóz jáne elektrondyq BAQ kafedrasynyń qurmetti meńgerýshisi, jýrnalısıka metri Saǵymbaı Qabashuly Qozybaevtyń «Daıdıdaý» atalǵan esseler toptamasy bastady. Kitaptyń tusaýkeser rásimi Almatyda Ulttyq baspasóz klýbynyń alańynda ótti. Saltanatty is-sharaǵa arnaıy qonaq retinde tanymal aqyn, «Alataý Aqparat» medıaholdınginiń Shyǵarmashylyq damý jónindegi keńesiniń tóraǵasy Oljas Súleımenov pen keńes múshesi, Qazaqstan Jýrnalıser odaǵynyń tóraǵasy Seıitqazy Mataev, sondaı-aq «Nevada–Semeı» qozǵalysynyń vıse-prezıdenti Valerıı Jandáýletov qatysty.
Kóńilge senim uıalatady
İs-sharanyń moderatory bolǵan Valerıı Jandáýletov saltanatty jıyndy taǵy bir jaqsy habarmen bastady. Ol Sankt-Peterbýrgtegi «Palmıra» baspasy Oljas Súleımenovtiń shyǵarmalar jınaǵyn shyǵaryp jatqanyn aıtty (bul týraly gazetimizdiń aldyńǵy nómerinde habarlaǵanbyz).
Sondaı-aq, V.Jandáýletov IýNESKO qamqorlyǵyndaǵy Mádenıetterdi jaqyndastyrýdyń halyqaralyq ortalyǵy memlekettik qor muraǵatynan Oljas Omarulynyń Parıj, Nú-Iork syndy qalalarda óleń oqyǵan 60 jyl burynǵy beınejazbany tapqanyn habarlady. Aldaǵy ýaqytta bul beınejazbanyń úzindileri elimizdiń telearnalarynda kórsetiletin bolady. Aqjoltaı aqparat aıtylǵan soń, saltanatty sharanyń resmı alǵysózi Qazaqstannyń Eńbek Eri, «Nevada–Semeı» qozǵalysynyń jetekshisi, aqyn Oljas Súleımenovke berildi.
– Buryn memleket tarapynan ádebıetke qalaı kóńil bólinetin. Kitaptar myńdaǵan tırajben shyǵatyn. Meniń sońǵy kitaptarymnyń biri osy Almatyda 200 myń dana bolyp basyldy. Qazir buǵan kim senedi? «Ogonek» jýrnalyndaǵy kitapsham 2,5 mıllıon tıraj bolyp búkil KSRO oqyrmandaryna tarady. Onyń baǵasy 30 tıyn edi. Biraq munyń ózi memleketke óte tıimdi boldy. Barlyq kitapshalar ótip ketti. Jaqynda ony qaǵazdarymnyń arasynan taýyp alyp, sol kezder esime tústi, – dedi aqyn.
Sonymen qatar, O.Súleımenov «Alataý Aqparat» medıaholdınginiń kitap toptamasyn shyǵara bastaǵanyna qýanyshyn bildirip, kelesi kitapsha avtorlarynyń biri bolýǵa óziniń de úmitti ekenin aıtty: – «Alataý Aqparat» medıaholdıngi qalta kitapshalaryn shyǵaryp jatqanyna qýanyshtymyn. Birinshi kitapshany Sákeń tanystyryp otyr. Kelesi bolyp biz de basylarmyz dep úmittenemin. Ýaqyt óte kele tırajy da ósedi dep oılaımyn. Osyndaı kishkentaı qadamdarmen basylym sóziniń kúsh-qýatyn umyttyrmaımyz dep senemin. Almatyda saqtalǵan jýrnalısıkanyń jaryq buryshy – osy sala eshteńege qaramaı damı beredi degen nárse kóńilge senim uıalatady.
«Almaty aqshamy» gazetiniń 35 jyldyǵyna oraı kitaptar toptamasyn shyǵaramyz
İs-shara moderatory V.Jandáýletov tusaýy kesilgeli turǵan kitapshanyń Saǵymbaı Qozybaevtyń 56-kitaby ekenin aıta otyryp, ony sońǵy jyldary eń kóp kitap basyp shyǵarǵan avtor retinde «Gınnestiń rekordtar kitabyna» engizýdi usyndy. Odan keıingi sóz kezegin «Alataý Aqparat» medıaholdınginiń Bas dırektory Tólemis Kúlmuhamedov jalǵastyrdy:
– «Alataý Aqparat» medıaholdınginiń kitapshasyn shyǵarý ıdeıasyn maǵan bizdiń Shyǵarmashylyq damý jónindegi keńes usyndy. Bul keńestiń tóraǵasy – Oljas Súleımenov, sondaı-aq keńeske Murat Áýezov, Saǵymbaı Qozybaev, Seıitqazy Mataev kiredi. Bul kitaptar bizdiń jazýshylarymyz, qarymdy qalamgerlerimiz óz shyǵarmashylyq týyndylarymen bólise alatyn taǵy bir jańa alań retinde basylyp otyr. Oǵan qosa, qoǵamda oqý mádenıeti men ulttyq kodty qalyptastyrýǵa úles qosatyn, oqyrmandarǵa avtorlardyń sheberligin, sóz sulýlyǵyn óz boılaryna sińirýge kómektesetin qural bolsa deımiz. Birinshi kitapsha Saǵymbaı Qabashulynyń avtorlyǵymen shyqqanyna óte qýanyshtymyz. Aldaǵy ýaqytta ózge de ádebıet pen mádenıet tarlandarynyń kitaptaryn shyǵarý josparda bar. Kelesi jyldyń alǵashqy aılarynda «Almaty – júregimde» baıqaýyn ótkizetinimizdi jarıalaǵym keledi. Baıqaý aıasynda bizge jiberilgen maqala, esse, án-óleńderdiń bir bóligi gazetke basylsa, qalǵany osyndaı kitapshaǵa enedi, – dedi T.Kúlmuhamedov.
«Alataý Aqparat» medıaholdınginiń Bas dırektory kelesi jyly «Almaty aqshamy» gazetiniń 35 jyldyǵyna oraı taǵy birneshe jınaqtardyń shyǵatynyn atap ótti:
– Bıylǵy jyl barlyǵyna ońaı ótken joq. Jyl qalaı bastalǵany bárimizdiń esimizde. Bizdiń ujym úshin de aýyr jyl boldy. Áriptesimiz Mıhaıl Býrenkov ómirden ozdy. Osyndaı qıyndyqqa toly jyldy qalta kitapshalaryn jaryqqa shyǵarý arqyly jaqsy bastamamen túıindegimiz keldi. Kelesi rette «Almatý aqshamy» gazetiniń 35 jyldyǵyna oraı memlekettik tilde birneshe kitap toptamasyn shyǵaramyz, – dedi Tólemis Baqtybaıuly.
«Alataý Aqparat» medıaholdınginiń bastamalary qýantady»
Alǵysózderden keıin Oljas Súleımenov bastaǵan zıaly qaýym «Daıdıdaý» kitabynyń tusaýyn kesip, saltanatty is-shara qatysýshylaryna úlestirdi. Jıynnyń resmı kezeńi bitken soń, jańa kitapshanyń avtory Saǵymbaı Qozybaev «Alataý Aqparat» medıaholdıngine alǵysyn bildirdi:
– Birinshi kezekte Tólemis Baqtybaıuly basqaryp otyrǵan «Alataý Aqparat» medıaholdıngine rızashylyǵymdy bildiremin. Qazir ózderińiz biletindeı, kóptegen basylymdar jabylyp jatyr. Mundaı aqparat alańyndaǵy ózgerister bizdi alańdatady. Oljas Omaruly aıtqandaı, óz mádenıetimizge bulaı qaraýǵa bolmaıdy. «Almaty aqshamy» men «Vechernıı Almaty» gazetterin biriktirip otyrǵan «Alataý Aqparat» medıaholdınginiń jýrnalısıka salasyndaǵy bastamalary kóńil qýantady. Bir aıdaı ýaqyt ishinde kitapshany shyǵaryp otyrmyz. Munda meniń buryn jarıalanǵan, biraq eshqandaı jınaqtarǵa kirmegen maqalalarym endi. Bir jarym ǵasyrǵa jýyq Qazaqstan jýrnalısıkasynyń tarıhynda bul – alǵashqy basylym kitapshasy. Ol qaltaǵa sıatyndaı shaǵyn ári metro, avtobýstar sekildi qoǵamdyq kólikterde oqýǵa yńǵaıly, – dedi Saǵymbaı Qozybaev.
Budan keıin Qazaqstan Jýrnalıser akademıasynyń prezıdenti medıaholdıngke jazý mashınkasyna arnalǵan 1960 jyldyń taspasyn syılady. Al Qazaqstan Jýrnalıser odaǵynyń tóraǵasy Seıitqazy Mataev áriptesiniń sózin jalǵap, «Alataý Aqparat» ujymynyń mýzeıine óziniń birneshe jýrnalısik kýálikterin tapsyrdy.
Kitap tusaýkeserinde Saǵymbaı Qozybaev jarty ǵasyrǵa jýyq ýaqyt sabaq berip kele jatqan ál-Farabı atyndaǵy QazUÝ jýrnalısıka fakúltetiniń dekany Nurjan Qýantaıuly da qatysyp, bilim ordasy atynan quttyqtaýyn jetkizdi.
– Saǵymbaı Qabashuly - bárimizge ortaq tulǵa. Bizdiń ýnıversıtette bul kisiniń dáris berip júrgenine, mine, 50 jyl bolady. Onyń ústine «Almaty aqshamy» gazetin jaqsy bilemin, bul jerde 5 jyl buryn ózim de qyzmet etkenmin. Shyǵarmashylyq keńes usynysymen osyndaı kitapsha shyǵaryp jatqan qýanyshtaryńyzben quttyqtaımyn, – dedi jýrnalısıka fakúltetiniń dekany Nurjan Qýantaıuly.
Ol sonymen qatar, ýnıversıtet atynan «Alataý Aqparat» ujymyna ál-Farabı beınelengen kilemshe syılady.
«Almaty-akshamý» №147 (6282) 13 jeltoqsan, seısenbi, 2022 jyl