Kezdesý barysynda halyqtarymyzdyń tarıhı tamyry ortaq ekenine nazar aýdaryldy
Memleket basshysy Qasym-Jomart Toqaev Ortalyq Azıa medıa forýmynyń qatysýshylarymen kezdesti, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Ortalyq Azıa medıa forýmynyń qatysýshylary – Túrkıanyń burynǵy prezıdenti Abdýlla Gúlmen, Mońǵolıanyń burynǵy prezıdenti Nambaryn Enhbaıarmen jáne Qyrǵyz Respýblıkasynyń memlekettik hatshysy Sýıýnbek Kasmambetovpen kezdesti.
Mártebeli meımandar Qasym-Jomart Toqaevty Qazaqstan Respýblıkasy Prezıdenti laýazymyna qaıta saılanýymen quttyqtap, onyń bastamasymen júrgizilip jatqan reformalar men saıası jańǵyrýlarǵa oń baǵa berdi.
Prezıdent Ortalyq Azıa medıa forýmyna qatysqany úshin qonaqtarǵa alǵys aıtyp, elderimiz arasynda kópjaqty yntymaqtastyqtyń damýy baýyrlastyq jáne dostyq qarym-qatynasty nyǵaıta túsetinine senim bildirdi.
Kezdesý barysynda halyqtarymyzdyń tarıhı tamyry ortaq ekenine nazar aýdaryldy. Sondaı-aq olar mádenı-gýmanıtarlyq jáne ǵylymı salalarda birlesken jobalardy iske asyrý qajettigi jóninde pikir almasty.