Kezdesýde zańsyz esirtki aınalymyna, uıymdasqan qylmysqa, jemqorlyqqa, terorızmge, sondaı-aq kıber qylmysqa qarsy kúres jónindegi yntymaqtastyq máseleleri talqylandy
Qazaqstan Prezıdenti elimizge saparmen kelgen BUU-nyń Venadaǵy bólimshesiniń Bas dırektory, BUU Esirtki jáne qylmys jónindegi basqarmasynyń atqarýshy dırektory Gada Valıdi qabyldady, dep habarlaıdy Almaty-akshamy.kz Aqorda saıtyna silteme jasap.
Qasym-Jomart Toqaev BUU-nyń halyqaralyq isterdegi negizgi rólin atap ótip, Qazaqstannyń dúnıejúzilik uıymmen ornyqty damý, qaýipsizdik pen turaqtylyqty qamtamasyz etý salalary boıynsha tyǵyz is-qımyldardy jalǵastyrýǵa múddeli ekenin naqtylady. Memleket basshysy BUU-nyń Esirtki jáne qylmys jónindegi basqarmasynyń aımaqtaǵy, ásirese Aýǵanstandaǵy qazirgi ahýalǵa qatysty júrgizip otyrǵan belsendi qyzmetine qoldaý bildirdi.
Qazaqstan Prezıdenti BUU Esirtki jáne qylmys jónindegi basqarmasynyń Ortalyq Azıa úshin 2022-2025 jyldarǵa arnalǵan jańa baǵdarlamasynyń qabyldanýyn quptady. Atalǵan baǵdarlama tabysty yntymaqtastyqty odan ári jalǵastyrýdyń berik negizin qalaıdy.
Gada Valı elimizde júrgizilip jatqan, onyń ishinde quqyq qorǵaý júıesin jańǵyrtýǵa baǵyttalǵan reformalardy joǵary baǵalady. Sondaı-aq, Aýǵanstannan BUU qyzmetkerlerin evakýasıalaýǵa jáne olardy Almaty qalasynda ornalastyrýǵa kómek kórsetkeni úshin elimizge alǵys bildirdi.