Insell qalasynda (Germanıa) kónkımen júgirýden Álem kýbogynyń sheshýshi kezeńi aıaqtaldy, - dep habarlaıdy aqshamnews.kz Ulttyq olımpıada komıtetine silteme jasap.
Bul jarystyń nátıjesi sportshylardyń Álem kýbogynyń jalpy esebindegi oryndaryna áser etti.
Nadejda Morozova Qazaqstan quramasy sapynda reıtıńte eń joǵary nátıje kórsetti. 3000 metr qashyqtyqta ol besinshi orynda márege jetti. Sondaı-aq Morozova 1500 metrde de úzdik ondyqqa enip, altynshy oryndy ıelendi.
500 metr qashyqtyqta Krıstına Sılaeva onynshy oryndy saqtap qaldy. Osy dısıplınada Evgenıı Koshkınniń úzdik bestikke enýge múmkindigi joǵary boldy. Germanıadaǵy kezeńge deıin ol jalpy esepte jetinshi orynda turǵan edi.
Týrnırdiń alǵashqy kúninde Koshkın tórtinshi oryn alyp, reıtıńtegi jaǵdaıyn jaqsartty. Alaıda Álem kýbogynyń sońǵy kúni ol ereje buzyp, upaısyz qaldy. Nátıjesinde qazaqstandyq sportshy úzdik ondyqtan shyǵyp, 11-orynǵa tústi.
Áıelder arasyndaǵy komandalyq iz kesý jarysynda Qazaqstan quramasy Álem kýbogyn segizinshi orynmen aıaqtady.
Aıta keteıik, ulttyq quramanyń kelesi iri halyqaralyq jarysy - 2026 jyly Italıada ótetin Olımpıada oıyndary bolmaq.