Qazaqtelekom AIX bırjasynda kólemi 823 mln ıýánǵa deıingi (shamamen 118,2 mln dollar) oblıgasıalaryn ornalastyrýdy josparlap otyr, - dep habarlaıdy aqshamnews.kz.
Keıingi kezderi Qazaqstannyń ózge de emıtentteri ıýánmen qaryz tarta bastady:
Qazaqstannyń Damý Banki (QDB) — 2025 jylǵy qyrkúıekte Gonkong bırjasynda 3 jyl merzimge, jyldyq 3,35% tabystylyqpen 2 mlrd ıýán (~287 mln dollar) tartty.
Ónerkásipti damytý qory (QDB-nyń enshiles kompanıasy) — 2025 jylǵy shildede 5 jyl merzimge 500 mln ıýán kóleminde oblıgasıa ornalastyrdy. 2025 jylǵy qazanda taǵy da 5 jyl merzimge 500 mln ıýán aldy.
Qazaqstan Investment Corporation (QDB-men affılırlengen kompanıa) — 2025 jylǵy jeltoqsanda 5 jylǵa 5 mlrd ıýán tartty.
QDB-nyń Gonkongta tartqan qarajaty «Báıterek» tobynyń ishinde bólingen bolýy múmkin. «Báıterek» mundaı tásildi jıi qoldanady. Úsh jeke ornalastyrýdyń jalpy somasy QDB-nyń óz qaryzynan asyp túsýi — lımıtterdiń tolyq ıgerilgenin bildirmeıdi, sebebi naqty kólem týraly ashyq aqparat joq. Sondaı-aq, bul ıýán ótimdiligin túpkilikti kim alyp jatqany da belgisiz.
QazMunaıGaz (QMG) — 2025 jylǵy qazanda Gonkong bırjasynda 5 jyl merzimge, jyldyq 3,15% tabystylyqpen 1,25 mlrd ıýán (~180 mln dollar) tartty.
Fincraft Energy Holding Limited — jyldyq 9,0% kýpondyq mólsherlememen 10 jylǵa 1.2 mlrd ıýán(~172 mln dollar) shyǵardy. Bul qarjyny kompanıaǵa naqty kim bergeni jarıalanbady. QMG tartqan qarajat Keńes Raqyshevtyń qurylymdaryna baǵyttalýy ekitalaı, biraq mólsherlemelerdegi aıyrmashylyq (3.15%-ben alyp, 9%-ben ornalastyrý) ekonomıkalyq turǵydan óte tıimdi kórinedi. QMG-nyń qytaılyq merdigerlermen esep aıyrysýdy qajet etetin jobalar portfeli úlken.
QazPost — 2025 jylǵy 30 jeltoqsanda 3 jyl merzimge, jyldyq 4.2% kýpondyq mólsherlememen 360 mln ıýándyq (~50 mln dollar) oblıgasıalaryn ornalastyrdy.
Endi osy tizimge Qazaqtelekom qosyldy. El ishinde ıýán boıynsha mundaı iri ótimdilik kólemi is júzinde tek «Samuryq-Qazyna» deńgeıinde jınaqtalýy múmkin. Holdıń retinde «Samuryq-Qazyna» óziniń joǵary nesıelik reıtıńiniń arqasynda qarajat tartyp, keıin ony enshiles kompanıalary arasynda bólip otyrady.