Talaı jyldan beri aıtylyp ta, jazylyp ta kele jatqan, jaýyr bolǵan taqyrypqa taǵy da toqtalǵandy jón sanadyq. Maqsat - máseleniń túıini mamandarda ekenin aıtý.
«Jyl saıyn qazynadan qomaqty qarajat jumsalyp, jol tósemimen jerge «kóme» salady. Biraq, nátıjege kelgende, «aıdaǵanyń bes eshki, ysqyryǵyń jer jaradynyń» keri. Salynǵan joldardyń sapasy syn kótermeıdi» degen pikirler de aıtylyp jatady. Múmkin, oryndy aıtylǵan oı shyǵar. Qaı-qaısymyz da alysty jaqyndatyp, dittegen jerimizge tez jetkizetin taqtaıdaı túzý joldardyń bolǵanyn qalaımyz. Alaıda barlyǵy biz oılaǵandaı sonshalyq kúrdeli me?! Úmittiń taby bilinbeıdi degenge ishteı ılanǵyń da kelmeıdi eken. Hosh. Tere bergenge min esh ýaqyt túgesilmeıdi.
«Kóshiń kólikti bolsyn!» dep bata beredi qazaq. Al kóliktiń kúrejolsyz kúni qarań ekeni, sáıkesinshe, kez kelgen memlekettiń ekonomıkasy osy ınfraqurylymsyz damı almaıtyny, kóshi qarqyndy ilgerilemeıtini lajsyz dúnıe. Jol sapasy halyqtyń turmys deńgeıine, ekonomıkanyń damýyna tikeleı áser etip qoımaı, eldiń áleýmettik-saıası jaı-kúıinde de mańyzdy ról atqarady. Kólik joldary keńeıgen saıyn memlekettiń órkendeýiniń, halyqtyń ál-aýqatynyń jańa kókjıekteri, zor múmkindikteri ashyla túspek. Bylaı qaraǵanda, barlyǵy aıdan anyq bolyp kórinedi. «Al iske asyrýǵa kelgende nege turalap qalamyz?» degen zańdy saýal týyndaıdy. Múmkin mamandardyń biliktiligi jetispeıtin shyǵar.
Elimizdegi jol salasynyń ǵalymdary avtojol qurylysy boıynsha Qytaı eliniń tájirıbesin úırenip jatyr, dep habarlaıdy Almaty-akshamy.kz.
Delegasıanyń quramynda ınstıtýttyń vıse-prezıdenti Serik Ómirbaev, Jol-qurylys materıaldary jáne jańa tehnologıalar departamentiniń dırektory Ásel Nuǵmanova jáne basqa da mamandar bar.
Jumys barysyndaǵy kezdesýlerdiń birinde ınstıtýt ókilderi Szánsý Kólik ınstıtýtymen (Jiangsu Transportation Institute) yntymaqtastyq týraly memorandýmǵa qol qoıdy.
JSTI-men arada yntymaqtastyq týraly memorandýmǵa qol qoıylyp, eki eldiń jol-zertteý ınstıtýtyn quryp, uıymdastyrý máseleleri talqylandy. Qytaıdaǵy normatıvtik-tehnıkalyq bazany reformalaý máseleleri qaralyp, jańa tehnologıalardy engizý tártibi zertteldi. Sondaı-aq tyǵyz yntymaqtastyqty arttyrý jónindegi aldaǵy josparlar pysyqtaldy, - dedi Nuǵmanova.
Esterińizge sala keteıik, «QazjolǴZI» AQ elimizdegi avtojol salasynyń normatıvtik-tehnıkalyq bazasyn reformalaý boıynsha jumystardy júrgizip keledi. Uıymnyń sarapshylary jańa tehnologıalar men álemdik tájirıbeni eskere otyryp, jol salasynyń normatıvtik bazasynyń jańa qurylymyn ázirlep jatyr. Atalǵan mindet taıaý jáne alys shet elderdiń ozyq tájirıbesi negizinde júzege asyrylmaq. Osyǵan baılanysty joǵaryda atalǵan memorandým jasaý boıynsha bastama kóterildi.
Jol salasynyń sarapshylary keıingi 10 jylda QHR-da jol qurylysy sapasynyń aıtarlyqtaı óskenin atap ótti. Osy rette Qytaıdyń júrdek avtomobıl joldary men basqa da joǵary deńgeıli avtokólik joldaryn aıtarlyqtaı jyldam damytýda tájirıbesi mol ekenin aıta ketken oryndy.