Ótken jyly 30 oblystyq, 9 respýblıkalyq, 1 halyqaralyq jarys uıymdastyrylǵan.
Almaty oblysynda ulttyq sport jaqsy damyp keledi. Bul týraly «Jetisý Media» aqparattyq alańynda ótken brıfıńte Almaty oblysy dene shynyqtyrý jáne sport basqarmasynyń basshysy Nurbaqyt Teńizbaev aıtyp berdi, dep habarlaıdy Almaty-akshamy.kz Baq.kz silteme jasap.
«Almaty oblysynda ulttyq sport túrleri boıynsha 3 sport mektebi jáne 1 ortalyq qyzmet kórsetip jatyr. Mekteptiń biri Taldyqorǵan qalasyndaǵy ıpodromda jumys istep jatyr. Ol jerde 29 bapker kúres, qazaq kúresi, qusbegilik, aýdaryspaq, jamby atý sıaqty sport túrlerinen mashyqtandyryp jatyr. Aýdandarda sport fılıaldary bar. Ol jerde 10-20 jas aralyǵyndaǵy balalarǵa ulttyq sport boıynsha sabaq ótkizilip jatyr. Búginde onda 511 sportshy bar. Ipodromda pandemıaǵa baılanysty 2020 jyldan beri eshqandaı is-shara ótkizilmedi», - dedi Nurbaqyt Teńizbaev.
Onyń aıtýynsha, 2022 jyly óńirdegi aýyldar men aýdan ortalyqtarynda ulttyq sporttan kóptegen is-shara ótkiziledi.
«Mamyr aıynda Jeńis kúnine oraı oblys ákiminiń kýbogy men ózge de ulttyq sport túrinen oıyndar ótkiziledi. Al, Qapshaǵaı qalasyndaǵy at sporty mektebinde kókpar, jamby atý oıyndarymen qatar olımpıadalyq oıyn túrlerinen at sporty túrleri jattyqtyrylady. Onda qazir 207 bala ulttyq sport túri boıynsha jattyǵady», - dedi ol.