Áleýmettik jelide jarıalanǵan Qytaı saıtyndaǵy Qazaqstan aýmaǵyndaǵy jerlerdiń satylatyndyǵy týraly aqparat jalǵan.
Áleýmettik jelide Qytaıdyń ınternet-alańdarynda qazaqstandyq aýyl sharýashylyǵy alqaptary ashyq satylyp jatqany týraly aqparat jarıalandy. Ony Aýyl sharýashylyǵy mınıstrligi joqqa shyǵardy, dep habarlaıdy Almaty-akshamy.kz.
«Qazaqstan Respýblıkasy Jer kodeksiniń 24-babynyń talaptaryna sáıkes, sheteldikter, azamattyǵy joq adamdar, sheteldik zańdy tulǵalar, sheteldik qatysýy bar Qazaqstan Respýblıkasynyń zańdy tulǵalary, halyqaralyq uıymdar, halyqaralyq qatysýy bar ǵylymı ortalyqtar, sondaı-aq qandastar aýyl sharýashylyǵy maqsatyndaǵy jer ýchaskelerin jeke menshik nemese jer paıdalaný quqyǵymen ıelene almaıdy, ıaǵnı aýyl sharýashylyǵy maqsatyndaǵy jer ýchaskelerin sheteldikterge berýge qatań tyıym salynǵan».
Bul týraly QR Jer komıtetiniń tóraǵasy-QR Jerdi paıdalaný men qorǵaý jónindegi Bas memlekettik ınspektory Murat Temirjanov óziniń facebook paraqshasynda jarıalady.
Sonymen qatar, aýyl sharýashylyǵy maqsatyndaǵy jer ýchaskelerin sheteldiktermen nemese azamattyǵy joq adamdarmen nekede turǵan (erli-zaıypty) Qazaqstan Respýblıkasynyń azamattaryna jeke menshikke jáne jer paıdalaný quqyǵymen berýge jol berilmeıdi.
«Áleýmettik jelide jarıalanǵan Qytaı eliniń saıtyndaǵy Qazaqstan aýmaǵyndaǵy jerlerdiń satylatyndyǵy týraly aqparat jalǵan ekendigin málimdeımiz», - dep jazady Murat Temirjanov.
Sondaı aq, Kodekstiń 38-babynyń 5-tarmaǵyna sáıkes jeke jáne zańdy tulǵalarǵa ýaqytsha jer paıdalaný quqyǵymen tıesili aýyl sharýashylyǵy maqsatyndaǵy jer ýchaskelerin aýyl sharýashylyǵy óndirisin júrgizý úshin keıingi jer paıdalanýǵa (sýbarendaǵa) berýge jol berilmeıdi.
«Eger kez kelgen sýbektiler tarapynan atalǵan zań normalaryn buzý derekteri anyqtalǵan jaǵdaıda olarǵa jol bergen sýbektiler zańnama talaptaryna sáıkes jaýapqa tartylady jáne bul másele vınıstrliktiń turaqty baqylaýynda», - degen jazba qaldyrdy.