Joba jylyna 400 mln teńgege deıin búdjetti únemdeýge múmkindik beredi.
Astana qalasynyń № 2 kóp beıindi qalalyq aýrýhanasynda alǵash ret gospıtáldyq farmasıanyń jańa bólimshesi ashyldy, dep habarlaıdy Almaty-akshamy.kz.
Densaýlyq saqtaý mınıstrliginiń habarlaýynsha, bólimsheniń ashýdaǵy basty maqsat – pasıentterge preparattardy jetkizý júıesin sıfrlandyrý, dárilik zattardyń derbestendirilgen esebin júrgizý.
«Munda beriletin dári-dármekterdiń sany avtomatty túrde baqylanady. Bul bólimsheniń biregeıliligi - medısınalyq dári-dármekterge jumsalatyn shyǵystardy únemdeý. Sonymen qatar, durys emes taǵaıyndaýlar men emdeý qaýpi azaıady. Aldyn ala esepteýler boıynsha joba jylyna 400 mln teńgege deıin búdjetti únemdeýge múmkindik beredi», - dep atap ótti elordalyq qoǵamdyq densaýlyq saqtaý basqarmasynyń basshysy Tımýr Muratov.
Gospıtaldyq farmasıa bólimshesiniń jobasy búkil álemde qoldanylady jáne halyqaralyq talaptardyń biri bolyp tabylady. Qazir qala boıynsha 9 stasıonar jumys isteıdi, aldaǵy ýaqytta bul júıeni barlyq kóp beıindi aýrýhanalarǵa engizý josparlanýda.
«Jobanyń negizgi mindeti - dárigerlerdiń taǵaıyndaýy boıynsha dárilik zattardy ýaqtyly jáne sapaly daıyndaý jáne býyp-túıý, sondaı-aq olardy medısınalyq uıymnyń klınıkalyq jáne para-klınıkalyq bólimshelerine jetkizý. Klınıkalyq farmakolog ár pasıentke jas, salmaq, qarsy kórsetilimder, táýliktik doza jáne t.b. parametrleri boıynsha taǵaıyndaıdy. Bul jobany iske asyrý kezinde bizdiń klınıkada jumys isteıtin Akgún aqparattyq júıesiniń daıyndyǵy mańyzdy ról atqardy», - dedi №2 KBA bas dárigeri Nurbol Tursynbaev.
Aýrýhana basshysy bolashaqta klınıkanyń eki jeke ǵımaratyn biriktiretin jáne qabyldaý bólmeshesiniń habyna aınalatyn jańa ǵımarattyń jobasyn usyndy. Dál osy jerde balalarǵa arnalǵan jańa travmatologıalyq pýnkt ashý josparlanýda.
Aýrýhanada pasıentke baǵyttalǵan modeldi damytý maqsatynda - pasıentterdi qoldaý qyzmeti qadamdyq qoljetimdilikte, elektrondyq kezek engizildi, pasıentterdi josparly emdeýge jatqyzý algorıtmi pysyqtaldy. Jaqyn arada barlyq nıet bildirýshiler onlaın rejımde bos tósek-oryndardyń sanyn kóre alady, ol klınıkanyń saıtynda da qoljetimdi bolady.