VII Baiqonyr International Short Film Festival shymyldyǵy resmı jabyldy. Kınofestıvaldiń ulttyq baıqaýyndaǵy basty marapat – «Úzdik fılm» ataǵyn rejıser Mıhaıl Plıskonyń «Rýh» atty qysqametrajdy kartınasy jeńip aldy.
Fılm ómirdiń mánin materıaldyq paıdaǵa aýystyrǵan Erǵalym esimdi orta jastaǵy júrgizýshiniń oqıǵasyn baıandaıdy. Ol balasyz áıeli Juldyzben ajyrasýǵa ótinish beredi. Osy ýaqytta balalar úıinen 12 jasar bala Farýh qashyp ketedi. Taǵdyr Erǵalym men Farýhty kezdestiredi, nátıjesinde ekeýiniń de ómiri túbegeıli ózgeredi.
Baıqaýda Saha respýblıkasynan (RF) kelgen rejıser Illarıon Iakovlevtiń «Taksıst» kartınasy da úzdik atandy. Bul jumbaq jolaýshyny kezdestirgen Tolı esimdi júrgizýshiniń oqıǵasy... Anımasıalyq baıqaýda ulttyq kınony qoldaý memlekettik ortalyǵynyń kómegimen túsirilgen Dılshat Rahmatýllınniń «Besik jyry» týyndysy da úzdikter qatarynan tabyldy.
Ulttyq baıqaýda UKQMO-nyń qoldaýymen túsirilgen taǵy bir kartına júldeli boldy – «Qus» fılmindegi róli úshin Aqmaral Zyqaeva «Úzdik aktrısa» atandy. Sonymen birge, «Qazaqfılm» kınostýdıasynyń arnaıy syılyǵyn – tolyqmetrajdy kórkem fılmdi birlesip shyǵarý kezinde tehnıkalyq qamtamasyz etý múmkindigin Álisher Jádigerov «Qańtar» atty jumysymen utyp aldy. Bul - Álisherdiń halyqaralyq kınofestıvalderdegi birinshi júldesi emes. Buǵan deıingi eńbekteri – «Otaý» jáne «Balyq sorpa» qysqametrajdy fılmderi Ońtústik Koreıa, Portýgalıa, Iran, Túrkıa jáne Italıadaǵy báıgelerdiń júldegerleri atanǵan. Al «Karantın» atty derekti fılmi 5-shi Baiqonyr ISFF-niń «Eń úzdik derekti fılm» dep tanylǵan edi.
Esterińizge sala keteıik, «Baiqonyr» – Qazaqstandaǵy tuńǵysh halyqaralyq qysqametrajdy fılmder kınofestıvali. Ol jeti jyldan beri jas kınematografısterge qoldaý kórsetip keledi jáne Qazaqstanda ǵana emes, jaqyn jáne alys shetelderdiń ondaǵan elinde de jańa esimderdi tanytýda.