Abaı atyndaǵy Qazaq ulttyq opera jáne balet teatrynda jańa maýsym ashyldy
Abaı atyndaǵy opera jáne balet teatrynda 89-shy maýsym ashylyp, OPERALIA klasıkalyq ónerdiń halyqaralyq festıvali bastaldy.
Ótken demalys kúnderi Abaı atyndaǵy Qazaq ulttyq opera jáne balet teatry ónersúıer qaýym úshin esigin aıqara ashty. Qalyptasqan dástúr boıynsha jańa maýsym OPERALIA festıvaliniń birinshi kúngi baǵdarlamasyna engen Ahmet Jubanov pen Latıf Hamıdıdiń «Abaı» operasymen ashyldy. Operanyń basty partıalaryn Qazaqstan Respýblıkasynyń eńbek sińirgen qaıratkeri, Abaı atyndaǵy QazUOBT jetekshi solısi Talǵat Kúzembaev (Abaı), Qazaqstannyń eńbek sińirgen ártisi, Shymkent qalalyq opera jáne balet teatrynyń dırektory, Parıjdik «Grand Operadaǵy» Qazaqstannan shyqqan alǵashqy solıs Maıra Muhamedqyzy (Ajar), QR eńbek sińirgen qaıratkeri, «Astana Opera» teatrynyń jetekshi solısi Meıir Baınesh (Aıdar) oryndady.
Maıra Muhamedqyzy men Meıir Baınesh – Abaı atyndaǵy Almaty opera jáne balet teatrynyń tálimgerleri. Búginde halyqaralyq dárejede tanylǵan ártister uzaq jyldar boıy osy teatrǵa qyzmet etip, óner ordasyna týǵan úıindeı baýyr basqan. «Abaı» operasynyń kórsetilimi aldynda ótken baspasóz máslıhatynda Maıra Muhamedqyzy men Meıir Baınesh tálim alǵan «qara shańyraqqa» alǵys aıtyp, almatylyqtardy shýaqty qalamyzdyń týǵan kúnimen quttyqtady. Maýsymashardyń ekinshi kúni kórermenderge klasıkalyq balet – Petr Chaıkovskııdiń «Aqqý kóli» kórsetildi. Ondaǵy basty partıalardy Abaı atyndaǵy QazUOBT solıseri, halyqaralyq konkýrstardyń laýreattary Malıka Elchıbaeva (Odetta, Odıllıa) jáne Azamat Asqarov (Rotbart), sondaı-aq Sankt-Peterbýrgten kelgen qonaq, «Marıın» teatrynyń solısi – Nıkıta Korneev (Zıgfrıd hanzada) oryndady.
«Jergilikti balet trýppasynyń óneri men kásibı deńgeıi bizdiń teatrlarymyzdan, sonyń ishinde Marıın teatrlarynan esh kem túspeıdi. Barlyq ónerpazdar naǵyz kásibı mamandar, barlyǵy jaqsy daıyndyqtan ótken ári shynaıy ar-ujdanmen eńbek etedi. Mundaı jumysty, kásibı etıkany kórý óte jaqsy. Malıka Elchıbaevamen biz Máskeýdegi konkýrsta tanystyq, endi birge jumys isteýge múmkindik týdy», – dep pikir bildirdi Nıkıta Korneev. Ol baspasóz konferensıasynda Almaty týraly oıymen de bólisti:
– Men jergilikti ártistermen barynsha aralastym, eń jaqsy nátıje kórsetý úshin spektáklden birneshe kún buryn arnaıy keldim. Osy birneshe kún ishinde Almatyny tek jaqsy qyrynan tanydym, keremet tabıǵat kórinisi men jergilikti halyqtyń mádenıeti maǵan tek jaqsy áser qaldyrdy.
Festıváldiń úshinshi kúni, 14 qyrkúıekte uıymdastyrýshylar qazaqstandyq kompozıtor Erkesh Shakeevtiń sımfonıalyq shyǵarmalarynan turatyn REMEMBER ME biregeı konserttik baǵdarlamasyn usynady. QazUOBT bas dırıjeri, QR eńbek sińirgen qaıratkeri Erbolat Ahmedárovtyń aıtýynsha, bul konsert bir-aq ret tek Londonda kórsetilgen:
– Bul kópshilikti Erkesh Shakeevtiń sımfonıalyq shyǵarmalarymen tanystyrǵan alǵashqy konsert boldy, buǵan deıin ol negizinen estrada úshin jumys isteıtin kompozıtor retinde tanymal bolǵan. Endi Erkesh Shákeev ózin basqa qyrynan kórsetýge bel býdy. Londondaǵy konsertte koróldik fılarmonıa orkestri onyń shyǵarmalaryn oınady. Bul konsertti Mádenıet jáne sport mınıstri kórip, Almatyda qaıtalaýdy ótindi. Bizdiń teatrdyń sımfonıalyq orkestriniń jandy oryndaýynda Erkesh Shakeevtiń týyndylary osy festıválde shyrqalady, konsertke Ulybrıtanıadan kelgen pıanıs Olıver Pýl jáne Venadan kelgen skrıpkashy Rýsanda Panfılı qatysady. Bul London konsertiniń qaıtalanýy bolady, onda konsert eki jarym saǵat ótti. Al munda biz konsertti kórermenderimiz ózderin jaıly seziný úshin múmkindikke qaraı jáne kompozıtordyń Almatyda tyńdaǵysy keletin baǵdarlamasy boıynsha uıymdastyramyz.
Dırıjerdiń aıtýynsha, konsertke Erkesh Shakeevtiń ózi kórermen retinde qatysýy kerek.
Al 16 qyrkúıek kúni Ońtústik Koreıanyń mádenıet qaıratkerleriniń konserti ótedi. Sahnada Kim Se Yun (barıton), Kim Hye Jin (soprano), Yoo Sanghyun (tenor) óner kórsetedi. Abaı atyndaǵy QazUOBT sımfonıalyq orkestrine «PongTek fılarmonıa» orkestriniń kórkemdik jetekshisi ári bas dırıjeri, Seýldiń konserttik orkestriniń bas dırıjeri, PongTek ýnıversıtetiniń profesory Te Chol dırıjerlik etedi.
Festıvál 18 qyrkúıekte Maıra Muhamedqyzy, Meıir Baınesh, Kim Se Yun, Kim Hye Jin, Yoo Sanghyun jáne arnaıy shaqyrylǵan qonaq – belgili cheh barıtony, Eýropalyq óner odaǵynyń kórkemdik jáne mádenı qyzmet salasyndaǵy eń joǵary nagradasynyń ıegeri – Fılıp Banjaktyń qatysýymen ótetin galakonsertpen aıaqtalady. Bul is-sharalar Abaı atyndaǵy opera jáne balet teatrynyń almatylyqtar men qala qonaqtaryna arnaǵan syıy bolmaq.