Olar nárestelerdi balasy joq otbasylarǵa usynǵan.
Almatyda nárestelerdi satýmen aınalysqan uıymdasqan qylmystyq topqa qatysty tergeý sharalary bastaldy, dep habarlaıdy Almaty-akshamy.kz
Qazirgi kezde kúdiktiler ustalyp, ýaqytsha ustaý ızolátoryna qamaldy.
«Aldyn ala sóz baılasqan adamdar toby ózderiniń balalarynan bas tartqysy keletin júkti áıelderdi jáne balalary joq erli-zaıyptyny izdegen. Sondaı-aq balalardyń týý týraly jalǵan kýáligin daıyndaýmen aınalysqany anyqtaldy. Atalǵan fakti boıynsha «Kámeletke tolmaǵandardy satý» baby boıynsha sotqa deıingi tergep-tekserý bastaldy», - dedi ishki ister mınıstrliginiń resmı ókili Shuǵyla Turlybek.
Aıta keteri, Qylmystyq kodekstiń 135-baby («Kámeletke tolmaǵandar saýdasy, adamdar tobynyń aldyn ala sóz baılasýymen jasalǵan áreket») boıynsha toǵyz jyldan on eki jylǵa deıingi merzimge bas bostandyǵynan aıyrý jazasy qarastyrylǵan. Kináli adamdardyń múlki tárkilenedi.