Almaty qalasy Bilim basqarmasy «№1 Oqýshylar úıinde» «Aıtyskerler qaýymdastyǵy» qurylýyna oraı aǵymdaǵy jyldyń «Jas aqyndar músháırasy» ótti. Múshaıra Oqý-aǵartý mınıstrliginiń «Tórt toqsan – tórt óner» jobasy negizinde uıymdastyryldy.
İs-sharaǵa aqyn Qýanysh Qolqa, «Daryn» memlekettik jastar syılyǵynyń ıegeri Syrym Áýezhan, «Jiger» fızıka-matematıka mektebiniń qazaq tili ádebıeti pániniń muǵalimi Ularbek Jeńisbekuly, jas aıtysker aqyn Beksultan Daryn jáne ustazdar, ónerli jastar, oqýshylar, t.b. qatysty.
«Jas aqyndar músháırasynyń» maqsaty – qazaq halqyna ǵana tán ónerdi, ıaǵnı aıtysty jasóspirimder arasynda jandandyryp, oqýshylardyń aıtys ónerine degen qyzyǵýshylyǵyn oıatyp, sóz qudiretin sezine bilýge úıretip qana qoımaı, sóz saptaýǵa beıim, sýyrypsalmalyq qasıeti basym jas aqyndardy qoldaý jáne olardyń shyǵarmashylyǵyn shyńdaý.
Músheıranyń negizgi mindetteri – oqýshylardyń qazaq halqynyń tiline, ádebıetine, sonyń ishinde aıtys ónerine degen qyzyǵýshylyǵyn arttyryp, bilimin keńeıtý. Sondaı-aq, ulttyq rýhty kóteretin aıtys ónerin tereńdete úırenýge yntalandyryp, jasóspirimderdiń ózindik qabiletterin oı ushqyrlyǵy, qıal júıriktigi, sóz dáldigin jetildirýge jaǵdaı jasaý bolyp sanalady.
Sonymen qatar óz eline, óziniń otanyna maqtanysh sezimin qalyptastyrýǵa, bilim alýshylardyń qazaq halqynyń tarıhy men mádenıetine degen qyzyǵýshylyǵyn arttyrýǵa, aqyndardyń dástúrlerin laıyqty jalǵastyrý úshin óz úlesin qosýǵa kelgen birqatar aıtysker aqyn, ónerli jastar óz oı-pikirlerin ortaǵa saldy.
«Qazaq halqynyń tól óneri aıtystyń bala shyǵarmashylyǵy men tárbıesindegi róli zor. Rýhanı muralardy qasterlep, aýyz ádebıetine sýsyndap, alǵyr da zerek bolýyna yqpaly bar. Sondyqtan, aıtys óneriniń oqýshylar arasynda nasıhattalyp, is-sharalardyń ótkizilýi dombyranyń da bedelin kóterip, qadiriniń artýyna septigin tıgizedi», – dedi aıtysker aqyn Syrym Áýezhan.