«Serpin» baǵdarlamasy: Qazaqstannyń ońtústik óńirlerindegi 10 myńnan astam oqýshy kásiptik baǵdar berý jumysymen qamtyldy, - dep habarlaıdy aqshamnews.kz.
Kozybayev University Qazaqstannyń ońtústik óńirlerindegi 10 000-nan astam oqýshyny qamtyǵan aýqymdy kásiptik baǵdar berý jumystaryn júzege asyrdy. Qyzylorda jáne Túrkistan oblystarynda ýnıversıtet ókilderi Shymkent, Túrkistan, Qyzylorda qalalary sekildi iri eldi mekenderden bastap shalǵaı aýyldarǵa deıingi 25 eldi mekende boldy.
Kezdesýler barysynda mektepter men kolejderdiń bitirýshi túlekterine joǵary oqý ornyna túsý erejeleri, oqý sharttary, sondaı-aq stýdenttik jataqhanalarda turý múmkindikteri týraly jan-jaqty aqparat berildi. Aıta ketý qajet, Kozybayev University-de eki zamanaýı Stýdentter úıiniń paıdalanýǵa berilýiniń nátıjesinde basqa óńirlerden kelgen bilim alýshylardy jataqhanamen qamtamasyz etý deńgeıi 100 paıyzdy quraıdy. Sonymen qatar ýnıversıtet kampýsy jańa oqý-zerthanalyq korpýspen, zamanaýı kovorkıng-keńistiktermen jáne sapaly bilim alýǵa qajetti materıaldyq-tehnıkalyq bazamen jabdyqtalǵan.
Talapkerler men olardyń ata-analaryna «Serpin» baǵdarlamasyna qatysý, Petropavl qalasyna qonys aýdarý, ornalastyrý jáne beıimdelý máseleleri boıynsha keńester berildi.
Qazirgi ýaqytta atalǵan baǵyt boıynsha Kozybayev University-de 150-den astam stýdent bilim alady. 2024 jyly ýnıversıtet bazasynda barlyq múddeli memlekettik organdardy biriktiretin Serpin Qoldau óńirlik jobalyq ofısi quryldy. Onyń qyzmeti aıasynda bilim alýshylardy kásibı baǵyttaý, trenıńter, tildik kýrstar, psıhologıalyq beıimdelý baǵdarlamalary, sondaı-aq mádenı ıntegrasıaǵa baǵyttalǵan is-sharalar júzege asyrylady. 3-4 kýrs stýdentteri dýaldy oqytýǵa jiberilip, jeke eńbek shartyn jasasýǵa deıin súıemeldeý júrgiziledi. Túlekterdiń jumyspen qamtylýyna járdemdesý maqsatynda ýnıversıtet Soltústik Qazaqstan oblysyndaǵy iri jumys berýshilermen yntymaqtastyq týraly memorandýmdar jasasty. Sonymen qatar ýnıversıtet baǵdarlama túlekterine jataqhanalardan ýaqytsha turǵyn úı usynady.
Oqýshylarmen ótken kezdesýler barysynda Arızona ýnıversıtetimen birlesip júzege asyrylatyn qos dıplomdy bilim berý baǵdarlamalaryn tanystyrýǵa erekshe nazar aýdaryldy. Atap aıtqanda, basqarýdaǵy aqparattyq júıeler, bıotehnologıa, ınklúzıvti bilim berý, bıznes jáne menedjment baǵyttary usynyldy.